काठमाडौं । राष्ट्रिय जनमोर्चा पार्टीका अध्यक्ष चित्रबहादुर केसीले बदनाम भएको व्यक्तिको सहयोग लिएर सत्ता पक्षले जनताको अपमान गरेको बताएका छन् । बुधबार संसद् भवन परिसरमा सञ्चारकर्मीसँगको कुराकानीका क्रममा उनले नेकपा (माओवादी केन्द्र) र नेकपा (एमाले)ले पार्टीमा 'गृहमन्त्री बन्न सक्ने कोही नभेटेको हो ?' भन्दै प्रश्न गरे ।
उनले मुद्दा लागेको व्यक्तिलाई उपप्रधान एवं गृहमन्त्री बनाएर सरकारले जनताको अपमान गरेको बताए ।
रवि लामिछानेले आफ्ना जालसाझीहरू लुकाउन गृहमन्त्री नै हुनुपर्ने माग राखेको पनि उनको भनाइ छ । उनले दोषीलाई उम्काउने हो भने मुलुकको दुर्गति हुने तर्क गरे ।
"यत्रो हाउसभित्र र बाहिर पनि यस्तो बदनाम मान्छेको सहारा लिएर जुन खालको सत्ता पक्षले गतिविधि गरिरहेको छ, यो त विचित्रैको कुरा हो । यो मुलुकुमा त कोही पनि रैनछन्, गृहमन्त्री हुने मान्छे, माओवादीका लागि । एमालेभित्र पनि कोही रैनछन् । यो त वास्तवमा नेपाली जनतामाथि अपमान हो नि । त्यस्तो मुद्दा लागेको मान्छे । दोषीलाई उम्काउने हो भने मुलुक के हुन्छ ? गल्ती कमजोरी भएको छ, वर्तमान गृहमन्त्रीको । चौरासी तिक्डम गरेर उहाँलाई गृहमन्त्री हुनैपर्ने । त्यो सहकारीबाट आफूले उडाएको रकमलाई राफसाफ पार्न हो । कसले बुझेको छैन यो कुरा । त्यस्ता गलत र भ्रष्ट मान्छेको सहारा लिएर सत्ता टिकाउन सकिन्छ ?," उनले भने ।
