काठमाडौं । नेकपा (एमाले)का अध्यक्ष केपी शर्मा ओलीले आफूलाई प्रधानमन्त्री बन्न मन नलागेको भन्दै ठट्टा गरेका छन् । मंगलबार धनगढीमा सञ्चारकर्मीले प्रधानमन्त्रीमा आलोपालोका विषयमा सोधेको प्रश्नमा उनले कटाक्ष समेत गरे ।

“अहिले उहाँ (प्रधानमन्त्री पुष्पकमल दाहाल ‘प्रचण्ड’)लाई प्रधानमन्त्री भने हुन्छ भनियो,” ओलीले भने, “मलाई त्यति मन पनि लाग्या छैन । अरू कोही पनि अगाडि सरेको छैन । के गर्ने होला त, उहाँ (प्रचण्ड)ले नै खानुहोलाजस्तो पो देखिन्छ त ।”

कम्युनिस्ट एक हुन लागेको हो भन्ने प्रश्नमा उनले विकास हुनुपर्छ भन्ने शक्ति एक ठाउँमा उभिएको बताए । “असम्भव र सम्भवका कुरा तपाईंहरूसँग नगरौँ । विकास हुनुपर्छ, राष्ट्रिय हितको रक्षा हुनुपर्छ भन्ने शक्तिहरू एक ठाउँ भएर गठन गरेका छौँ । सरकार चलाउँदै छौँ,” उनले भने ।

केही समय लगाएर नयाँ सत्तासमीकरण तयार गरिएको उनले बताए । सरकार बनाउँदै छौँ भनेर पहिले नै भन्नु नपर्ने उनको भनाइ छ । “एकैरातमा सरकार बदलियो भने नि मान्छेहरूले, कति दिन अघि थाहा दिनुपर्थ्यो ? नियममा के छ ? कानुनमा के छ,” उनले प्रश्न गरे ।