काठमाडौं । चीनले भारतको अरुणाचल प्रदेशमाथि फेरि दाबी गरेको छ । अरुणाचल आफ्नो भू–भाग भएको चीनले दाबी गर्दै आएको छ । यसअघि चीनले भारतका प्रधानमन्त्री नरेन्द्र मोदीको अरुणाचल भ्रमणको विरोध गरेको थियो ।
चिनियाँ रक्षा मन्त्रालयका प्रवक्ता वरिष्ठ कर्नेल चाङ सियाओगेङले भने, “शिझाङको दक्षिणी भाग चीनको आन्तरिक क्षेत्र हो । चीन भारतले अवैध रूपमा स्थापित गरेको अरुणाचल प्रदेशको विरोध गर्दछ । हामीले अरुणाचल प्रदेशलाई कहिल्यै मान्यता दिएका छैनौँ ।”
अरुणाचल प्रदेशमा सुरुङ निर्माण गरेर आफ्नो भारतीय सेनालाई मजबुत बनाउन खोजेपछि चीनले त्यसको प्रतिक्रिया स्वरुप अरणाचलमाथि पुनः दाबी गरेको हो । चीनले अरुणाचल प्रदेशलाई दक्षिण तिब्बत मान्दै आएको छ ।
प्रधानमन्त्री मोदीले मार्च ९ मा अरुणाचल प्रदेशको भ्रमण गरी एक सुरुङमार्गको उद्घाटन गरेका थिए । यसप्रति चीनले आपत्ति जनाएको थियो । भारतका लागि रणनीतिक रूपमा महत्त्वपूर्ण यो सुरुङमार्गको उद्घाटनपछि चीनले भारतको यो कदमले सीमा विवादलाई थप जटिल बनाउने बताएको थियो । त्यसबेला पनि चीनले अरुणाचल प्रदेशलाई भारतले गैरकानुनी रूपमा स्थापना गरेकोले आफूले कहिल्यै मान्यता दिन नसक्ने प्रतिक्रिया जनाएको थियो ।
भारतीय विदेश मन्त्रालयले मोदीको अरुणाचल प्रदेश भ्रमणलाई लिएर चीनले आपत्ति जनाएपछि जवाफ दिएको थियो । अरुणाचल प्रदेश भारतको अभिन्न अंग हो भन्ने तथ्यलाई चीनको विरोधले परिवर्तन नगर्ने मन्त्रालयले जनाएको थियो । बीबीसी
