काठमाडौं । लागुऔषध खैरो हेरोइन मुद्दामा फरार एक आरोपित पक्राउ परेका छन् । प्रहरीको अन्तर्राष्ट्रिय अपराध संगठन इन्टरपोलको सहयोगमा कुवेतबाट पक्राउ गरी उनलाई नेपाल ल्याइएको हो ।

पक्राउ पर्नेमा इलामको इलाम नगरपालिका–१२ का २९ वर्षीय वर्षीय रोशन राई छन् । इलामकै २५ वर्षीय विकास बसेलसहित तीनजना खैरो हेरोइन ३७ ग्राम ५०० मिलिग्रामसहित पक्राउ परेका थिए । त्यसबारे अनुसन्धान गर्दै जाँदा उनको संलग्नता देखिएपछि पक्राउ गरिएको प्रहरीले जनाएको छ ।

नेसनल सेन्ट्रल ब्युरो (एनसीबी) काठमाडौंको अनुरोधमा इन्टरपोल महासचिवालयबाट गएको पुस २५ गते उनीविरुद्ध ‘रेड नोटिस’ जारी गरिएको थियो । कुवेतबाट नेपाल ल्याइएका राईमाथि लागुऔषध नियन्त्रण ब्युरोको टोलीले थप अनुसन्धान जारी राखेको प्रहरीले जनाएको छ ।