काठमाडौं । नवनिर्वाचित राष्ट्रियसभाका अध्यक्ष नारायण दाहालले पदभार ग्रहण गरेका छन् । मंगलबार शीतल निवासमा पद तथा गोपनीयताको शपथ लिएपछि उनले सिंहदरबार पुगेर पदभार ग्रहण गरेका हुन् ।

सिंहदरबारमा उनलाई राष्ट्रियसभा उपाध्यक्ष उर्मिला अर्याल, संसद् सचिवालयमा महासचिवसहितले स्वागत गरेका थिए ।

पदभारका क्रममा उनले राष्ट्रियसभा नियमावली, २०७५ को नियम ४० मा भएको व्यवस्था अनुसार राष्ट्रियसभामा मन्त्रीहरूसँग प्रश्नोत्तर गर्न सकिने भएकाले त्यसका लागि राष्ट्रियसभा सदस्यहरूका लागि अभिमुखीकरण सञ्चालन गर्ने निर्णय गरेका छन् ।

सञ्चारकर्मीसँग कुरा गर्दै उनले महत्त्पपूर्ण विधेयकलाई अघि बढाउनका लागि सबै दललाई साथमा लिएर अघि बढ्ने बताए ।

त्यस्तै, संविधान कार्यान्वयनका लागि बन्न बाँकी ऐन कानुनहरूको निर्माणलाई पनि गम्भीरताका साथ लिने उनको भनाइ छ ।