काठमाडौं । राष्ट्रिय जनमोर्चा पार्टीका राष्ट्रियसभा सदस्य तुलप्रसाद विश्वकर्माले सहकारी घोटालाको आरोपमा मुद्दा चलिरहेको व्यक्तिलाई देशको गृहमन्त्री बनाउने कुरा अस्वाभाविक भएको बताएका छन् ।

बिहीबारको राष्ट्रियसभा बैठकमा उनले मन्त्रिमण्डल विस्तार गर्ने क्रममा विभिन्न नागरिकता, दोहोरो पासपोर्टसहितका विषयमा मुद्दा चलेको व्यक्तिलाई गृहमन्त्रालय दिएकोप्रति आफूहरूको आपत्ति रहेको बताए ।

"मन्त्रिमण्डल विस्तार गर्ने क्रममा जुन व्यक्तिको उपर अदालतमा मुद्दा चलिरहेको छ । त्यो मुद्दाको किनारा लागेको छैन, नागरिकता, दोहोरो पासपोर्टका सवालहरू छन् । सहकारीमा घोटाला भएका मुद्दाहरू जीवितै छ । स्वयं उही व्यक्तिलाई गृह मन्त्रालय सुम्पिने काम भएको त्यो स्वाभाविकरूपमा स्वीकार्न सकिने कुरा होइन । यसमा हाम्रो पार्टीको आपत्ति छ," उनले भने ।

उनले प्रधानमन्त्रीले कसको दबाबमा सत्ता समीकरण परिवर्तन गरेको भन्दै प्रश्न पनि गरे ।

उनले नयाँ सरकारलाई जनताका जल्दाबल्दा समस्याहरू समाधान गर्नका लागि भूमिका खेल्न सुझाव दिए ।