काठमाडौं । प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिले स्पन्ज आइरन र बिलेट्स प्रयोग गरेर फलामे छड उत्पादन गर्ने कारखानाको अवलोकन गर्ने भएको छ ।

आइतबार सिंहदरबारमा बसेको समिति बैठकबाट स्पन्ज आइरन र बिलेट्सबीच भन्सार महसुल एवं अन्तःशुल्कका विषयमा थप अध्ययन र उद्योगको अवलोकन गर्न उपसमिति बनाउने निर्णय गरिएको छ । फलामे छडको कच्चापदार्थका रूपमा रहेको स्पन्ज आइरन र बिलेट्सबीचको भन्सारमा व्यवसायीको निरन्तर गुनासो आउने गरेको भन्दै उपसमिति बनाएर अवलोकन गर्ने निर्णय गरिएको हो ।

स्पन्ज आइरन र बिलेट्स प्रयोग गरेर उत्पादन हुने फलामे छडको गुणस्तर निरन्तर रूपमा कायम गर्न गुणस्तर तथा नापतौल विभागलाई निर्देशन दिने निर्णय पनि बैठकबाट गरिएको छ ।

यस्तै, स्पन्ज आइरन र बिलेट्सबीच भन्सार महसुल एवं अन्तःशुल्कका विषयमा समितिले यसअघि दिएको निर्देशन कार्यान्वयनको अवस्थाबारे अर्थ मन्त्रालयसँग जानकारी लिने निर्णय गरिएको सभापतिका सभापति अब्दुल खानले जानकारी दिए ।