एमाले सरकारमा नहुँदा विकास र समृद्धिको यात्रा रोकिएको पोखरेलको आरोप

राजनीति

एमाले सरकारमा नहुँदा विकास र समृद्धिको यात्रा रोकिएको पोखरेलको आरोप

शनिबार, फागुन १९, २०८०

एमाले सरकारमा नहुँदा विकास र समृद्धिको यात्रा रोकिएको पोखरेलको आरोप

जलेश्वर । नेकपा (एमाले)का महासचिव शंकर पोखरेलले देशको विकास र समृद्धिका लागि एमाले नेतृत्वको सरकारको विकल्प नरहेको बताएका छन् ।

महोत्तरी जिल्लाको सदरमुकाम जलेश्वरस्थित एमाले पार्टी कार्यालयमा आज बिहान भएको पत्रकार सम्मेलनमा महासचिव पोखरेलले वर्तमान सरकारको कार्यकालमा देशमा विकासको काम ठप्प भएर विकास र समृद्धिको यात्रा रोकिएको बताए । जनतामा निराशा छाएको उनको आरोप छ ।

महासचिव पोखरेलले नेपाली जनतामा छाएको निराशा, भ्रष्टाचारबाट मुक्ति र देशको विकास र समृद्धिका लागि देशमा बलियो राष्ट्रिय शक्तिको आवश्यकता रहेको उल्लेख गरे । सोही कारण एमालेले मिसन २०८४ ल्याएको उनको भनाइ छ ।

मिसन २०८४ अन्तर्गत एमालेलाई राष्ट्रकै बलियो पार्टी बनाएर प्रत्येक प्रदेशमा समेत एमालेको नेतृत्वमा सरकार बनाउन लागि पर्न जनतासँग आग्रह गरे । रासस