काठमाडौं । नेकपा (एमाले)का अध्यक्ष केपी शर्मा ओलीले अहिलेको गठबन्धन कुनै पनि बेला फुट्न सक्ने बताएका छन् ।

बुधबार विराटनगर विमानस्थलमा सञ्चारकर्मीसँग कुरा गर्दै ओलीले गठबन्धन खरानीको डल्लो भएकाले कुनै पनि बेला फुट्न सक्ने बताए । उनले आफूहरू सत्ताको खेलमा नरहेको स्पष्ट पारे । 

ओलीले भने, “अहिले मिसन–८४ मा लागेकाले कसैको काँध थाप्ने काम गरिँदैन, एमाले जनतामा आशा र उत्साह दिन लागिपरेको छ ।”

उनले कांग्रेसले मुलुकको राष्ट्रियता र अर्थतन्त्रप्रति चिन्ता नलिएको गुनासो गर्दै सत्तामा पुग्ने र टिकाउने खेलमा लागेको आरोप लगाए । मुलुकमा निराशा र अराजकता बढ्दा पनि चुप लागेर बसेको जिकिर गरे । 

त्यस्तै, उनले सुशासन दिएको दाबी गर्ने सरकारले आफैँले बनाएको आयोगले दोषी देखाएका मन्त्रीले राजीनामा दिएर नैतिकता देखाउनु पर्ने धारणा राखे । सत्य निरुपण तथा मेलमिलाप विधेयक छिटो पास गर्नुपर्ने बताउँदै पीडितको पक्षमा आएको विधेयकको कसैले विरोध नगर्ने जिकिर गरे ।