काठमाडौं । प्रतिनिधिसभामा आर्थिक वर्ष ०८१/०८२ का निम्ति विनियोजन विधेयकका सिद्धान्त र प्राथमिकता छलफलका लागि प्रस्तुत गरिएको छ । सोमबार प्रतिनिधिसभा बैठकमा अर्थमन्त्री डा. प्रकाशशरण महतले विनियोजन विधेयकका सिद्धान्त र प्राथमिकता सम्बन्धमा (कर प्रस्तावबाहेक)माथि छलफल गरियोस् भनी प्रस्ताव प्रस्तुत गरेका हुन् ।
गोप्य राखिने कर प्रस्तावबाहेक आउँदो आर्थिक वर्षमा सरकारको विनियोजन शीर्षकसम्बन्धी प्रस्ताव पेस गरिएको छ । त्यसमाथि यही फागुन २१, २२, २३ र ३० र आउँदो चैत १, २ र ४ गते छलफल गरिने सभामुख देवराज घिमिरेले जानकारी गराए ।
प्रिबजेट छलफल बजेट अधिवेशन सुरु हुनुअघि ‘कर्मकाण्डी’ रूपमा मात्र हुने गरी सरकारले प्रस्तुत गर्ने विगतको अभ्यास थियो । त्यो व्यावहारिक नभएको भन्दै संसद्मा गरिएको बहसका आधारमा फागुनभित्रै प्रिबजेट छलफल सुरु गर्ने प्रतिबद्धता गरिएको थियो । सोहीअनुसार बजेटका प्राथमिकता र सिद्धान्त प्रस्तुत गरिएको हो ।
सांसदहरूले सिद्धान्त र प्राथमिकतामा दिएको सुझाव बजेटमा नसमेटिने विगतको अभ्यासलाई चिर्न नयाँ अभ्यास थालिएको संघीय संसद् सचिवालयले जनाएको छ ।
