काठमाडौं । नेपाली कांग्रेसका प्रमुख सचेतक रमेश लेखकले संसद् काम नलाग्ने ठाउँ हो भन्ने सन्देश गए व्यवस्थाको लागि घातक हुने बताएका छन् ।

शुक्रबार प्रतिनिधिसभाको दोस्रो बैठकमा बोल्दै प्रमुख सचेतक लेखकले संसद् काम नलाग्ने ठाउँ हो भन्ने सन्देश सम्प्रेषण भएमा व्यवस्थाका लागि घातक हुने बताएका हुन् । उनले सांसदहरूको गतिविधि व्यवस्थाका विरुद्धमा वातावरण बन्नेतिर निर्देशित भएका छन् कि भन्ने विषयमा सोच्न जरुरी रहेको बताए । उनले धेरै विधेयकहरू बनाउनुपर्ने अवस्था रहेको भन्दै संसदभित्र अवरोध गर्नु नहुने पनि बताए ।

उनले भने, "यो अधिवेशनबाट धेरै विधेयकहरू पास गर्नुछ । धेरै विषयमा छलफल गर्नुछ । जनतालाई यो व्यवस्था, यो संसद्ले नै देशको हित गर्न सक्छ । हाम्रो संविधानको परिकल्पना पूरा गर्नसक्छ । र हामी यो मुलुकलाई समुन्नत मुलुक बनाउन सक्छौँ भन्ने प्रत्याभूति दिन जरुरी छ । हामी सबै मिलेर यदि अगाडि बढ्न सकेनौँ भने त्यो स्थिति बन्दैन । यदि यो संसद् काम नलाग्ने ठाउँ हो भन्ने सन्देश बाहिर संप्रेषण भयो भने यो व्यवस्थाका लागि त्योभन्दा ज्यादा घातक केही हुन सक्दैन । त्यसकारण कहीँ हाम्रा गतिविधिहरू यही संविधानका विरुद्धमा, यही व्यवस्थाका विरुद्धमा वातावरण बन्नेतिर निर्देशित त भइराखेका छैनन् ? त्यो पनि सोच्न जरुरी छ ।"

उनले संसदभित्र आलोचना स्वस्थ ढंगले गर्नुपर्ने बताए । धैर्यता र संयमित भएर आफ्ना कुराहरू राख्न सांसदहरूलाई आग्रह पनि गरे ।