पोखरा । पोखरामा यही वर्ष हुन लागेको गल्फ प्रतियोगितामा पोखरा महानगरपालिकाले प्रवर्धकको भूमिका निभाउने भएको छ । बाह्रखरी मिडियाले यस वर्ष पोखरामा ‘एनसेल बाह्रखरी गल्फ एन्ड बियोन्ड’ प्रतियोगिता गर्दै छ । त्यसमा अपनत्व जनाउँदै पोखरा महानगरपालिका प्रवर्धकको भूमिका रहेर प्रतियोगितालाई सहयोग गर्ने भएको हो ।
पोखरा महानगरपालिकाका मेयर धनराज आचार्यले यस इभेन्टमा प्रवर्धकको भूमिका निभाउने र यसले समग्र पोखरासहित गण्डकीलाई नै फाइदा हुने बताए ।
बाह्रखरी मिडिया र पोखरा महानगरपालिकाबीच छिट्टै प्रतियोगिताबारे सम्झौता हुँदै छ । यसलाई लिएर मेयर आचार्य उत्साहित छन् ।
बाह्रखरी गल्फकै विषयमा गत फागुन ७ गते एक कार्यक्रममा मेयर आचार्यले ‘बाह्रखरी गल्फ’ले पोखराको पर्यटन विकासमा सहयोग पुग्ने बताएका थिए ।
“चैतको पहिलो हप्तामा एउटा विशेष कार्यक्रम हुँदै छ, पोखरामा । गल्फ टुर्नामेन्ट हुँदै छ । त्यसलाई हामीले हरेक वर्ष गर्ने गरी क्यालेन्डरमा राख्ने कुरा आयोजक साथीहरूसँग भएको छ । त्यो चाहिँ सायद खेलभित्रको सबैभन्दा महँगो, एउटा उदाहरण मात्र भनेको,” मेयर आचार्यले भनेका थिए ।
बाह्रखरी गल्फजस्ता अरू इभेन्टहरू पोखरामा गर्न सकिने कुराहरूमा आफूहरूले योजनाभित्र राखेको उनको भनाइ छ । पोखरामा यस कोभिडको महामारीपछिको अवस्थामा सन् २०२१ मा गल्फ प्रतियोगिता भएको थियो । त्यतिबेलाको इभेन्टको बारेमा तत्कालीन स्थानीय सरकार प्रदेश सरकारले अर्थतन्त्रलाई गति दिन ठूलो योगदान पुर्याएको भन्दै प्रशंसा गरेका थिए ।
