काठमाडौं । नेकपा एमालेका अध्यक्ष ओलीले चलचित्र ‘गोर्खा वारियर’ले नेपालीको कथा भनेको बताएका छन् । बुधबार ‘गोर्खा वारियर’को प्रिमिरमा पुगेर चलचित्र हेरेका उनले नेपाली विषय समेटिएको भन्दै निर्माण पक्षलाई धन्यवाद समेत दिए । 

“यो चलचित्रले नेपाली कथा र विषयलाई समेटेको छ । चलचित्र भवनमा रहँदा मैले हाम्रो कथालाई पर्दामा हेर्न पाउँदा खुसी महसुस गरेँ । यसलाई अन्तर्राष्ट्रियस्तरमा प्रदर्शन गर्न हामी सबैले सहयोग गर्नुपर्छ”, अध्यक्ष ओलीले भने ।

चलचित्रले इतिहासको पानामा रहेको नेपालीको बहादुरीको कथालाई समेटेको बताए । बहादुरीको कथासँगै मानवीय संबेदनाका कुरा पनि चलचित्रमा अटाएको बताए । चलचित्रमा सस्पेन्स रहेको उनको प्रतिक्रिया छ । 

संस्कृति, पर्यटन तथा नागरिक उड्डयनमन्त्री सुदन किरातीले चलचित्र हेरिरहँदा आफ्नो आँखा रसाएको बताए । आपफ्ना बुवा र बाजेले पनि विभिन्न युद्ध लडेको स्मरण गर्दै उनले भने, “चलचित्र हेर्दा मैले कथासँग जोडिएको पाएँ । यो चलचित्रलाई हरेक नेपाली हेर्नुपर्छ । हाम्रो पुर्खाले लडेको युद्धसँगै वीर भनेर पाउने सम्मानका बारेमा हामी अवगत हुनेछौँ ।”

‘गोर्खा वारियर’का पर्दापछाडिका दुःख : जब हिरोको घाँटीमा डोरी कसियो...

राष्ट्रिय प्रजातन्त्र पार्टीका अध्यक्ष लिंदेनले ‘गोर्खा वारियर’ले नेपालीको वीरताको गाथालाई विश्वभर फैलाउने बताए । 

निर्देशक तथा लेखक मिलन चाम्सले वीरताको कथा र देशभक्तिलाई केन्द्रमा राखेर तयार गरिएको चलचित्रले पाएको प्रतिक्रियाले आफूलाई उत्साह थपेको बताएका छन् । यस्तै नेपाली विषयले नेपाली चलचित्रलाई विश्वबजारमा लैजान सकिने उनको भनाइ छ । 

‘गोर्खा वारियर’ मा सन् १९४९ मा मलाया जंगलमा बेलायती सेनामा आबद्ध गोर्खा सैनिकले लडेको लडाइँको कथा प्रस्तुत गरिएको  छ । 

फागुन ११ गते शुक्रबारदेखि चलचित्र ‘गोर्खा वारियर’ प्रदर्शन हुँदै छ ।