सर्लाही । सर्लाहीको बरहथवामा आज ट्र्याक्टर दुर्घटना हुँदा दुई जनाको मृत्यु भएको छ । अन्य ६ जना घाइते भएका छन् ।

बरहथवा नगरपालिका–१५, प्रिपाभित्तास्थित वाग्मती नदीको नहरमा ट्र्याक्टर दुर्घटना हुँदा ट्र्याक्टर धनीसमेत रहेका चालक रौतहट जिल्लाको गढीमाई नगरपालिका–९ का ५५ वर्षीय जयलाल सहनी र सोही ठाउँका ५० वर्षीय रामनाथ सहनीको घटनास्थलमै मृत्यु भएको सर्लाहीका प्रहरी प्रवक्ता दिपेन्द्र पञ्जियार थारूले जानकारी दिए ।

उनका अनुसार घाइते भएका ६ जनामध्ये दुईको अवस्था गम्भीर छ ।

रौतहटबाट सर्लाहीको हजरियातर्फ आएको ट्र्याक्टर अनियन्त्रित भई वाग्मती नदीको नहरमा खसेको प्रहरी प्रवक्ता थारूले बताइ । ट्र्याक्टरमा लेखिएको नम्बर प्रस्ट नभएको उनको भनाइ छ ।

ट्र्याक्टर दुर्घटनामा गढीमाई नगरपालिका–९ बस्ने १२ वर्षीय किसन सहनी, ४८ वर्षीया गर्भी देवी, १७ वर्षीय आकाश सहनी, ४५ वर्षीय सुकल देवी, १६ वर्षीया अञ्चला कुमारी र १८ वर्षीया नितेश सहनी घाइते भएका छन् ।

गम्भीर घाइते आकाश र किसनको वीरगञ्जमा उपचार भइरहेको प्रहरीले जनाएको छ । अन्य घाइतेको रौतहटको गौर गरुडामा उपचार भइरहेको प्रहरी प्रवक्ता थारूले जानकारी दिए । रासस