काठमाडौं । प्रहरीको केन्द्रीय अनुसन्धान ब्युरो (सीआईबी)ले सवारी चालक अनुमति पत्र (लाइसेन्स) प्रकरणको अनुसन्धान थालेको छ । यातायात व्यवस्था विभागले पत्राचार गरेपछि सीआईबीले अनुसन्धान थालेको हो ।

सीआईबी स्रोतका अनुसार डीएसपीको नेतृत्वमा छुट्टै टिम बनाएर अनुसन्धान अघि बढाएको छ । सीआईबीका प्रमुख एआईजी किरण बज्राचार्यले विभागबाट अनुसन्धानका लागि केही दिन अघिमात्रै पत्र आएको पुष्टि गरिन् । उनले भनिन्, “अनुसन्धानका लागि विभागबाट पत्र आएको छ । हामी हेर्दैछौँ ।”

यसअघि लाइसेन्स घोटला प्रकरणमा यातायात व्यवस्था विभाग आफैँले गरेको आन्तरिक छानबिनका क्रममा ६ किसिमका शंकास्पद लाइसेन्स फेला पारेको थियो ।

• ६ किसिमका शंकास्पद लाइसेन्स : जुनसुकै बेला प्रहरीले समात्न सक्छ !
• शंकास्पद नक्कली लाइसेन्स : कहाँबाट कति बाँडिए ? (विवरणसहित)

विभागको छानबिनका क्रममा एक लाख दुई हजार लाइसेन्स नक्कली रहेको भेटिएको छ । जसमध्ये करिब ७३ हजार ५०० वटा वितरण भइसकेको खुलेको थियो ।

छानबिनका लागि विभागले प्रविधि निर्देशक मुकेश रेग्मीको नेतृत्वमा शाखा अधिकृत अर्जुन अधिकारी, डाटा एडमिनिस्ट्रेटर सविन श्रेष्ठ तथा सीआईबीका डीएसपी तपनकुमार दाहाल र कम्प्युटर इन्जिनियर बोधराज बराल सदस्य रहेको समिति बनाएको थियो ।

सोही समितिले विभागका १० जना पूर्वमहानिर्देशकका पालामा उक्त घोटाला भएको देखाएको हो । नक्कली लाइसेन्स प्रकरणबारे अख्तियार दुरुपयोग अनुसन्धान आयोगले समेत छुट्टै अनुसन्धान गरिरहेको छ ।