काठमाडौं । नेपाल स्काउटको मुद्दा हेर्न नमिल्नेमा परेको छ । सोमबार सर्वोच्च अदालतका न्यायाधीशद्वय प्रकाशमानसिंह राउत र महेशशर्मा पौडेलको इजलासमा परेको मुद्दा हेर्न नमिल्नेमा परेको हो । 

गत माघ २१ मा स्काउटको तदर्थ समितिका प्रमुख तथा प्रमुख आयुक्त लोकबहादुर भण्डारीले रिट दायर गरेका थिए । उक्त रिटमा माघ २३ मा न्यायाधीश टेकप्रसाद ढुंगानाको इजलासले प्रधानमन्त्री र मन्त्रिपरिषद् कार्यालयको निर्वाचन स्थगित गर्ने पत्र तत्काल कार्यान्वयन नगर्न अल्पकालीन अन्तरिम आदेश जारी गर्दै अन्तरिम आदेश प्रयोजनका लागि दुवै पक्षलाई डाकेर माघ २५ गतेको पेसी तोकेको थियो । 

२५ गते न्यायाधीशहरू हरिप्रसाद फुयाल र सुनिलकुमार पोखरेलको संयुक्त इजालसमा परेको रिट हेर्न नमिल्नेमा परेको थियो । माघ २६ मा न्यायाधीशहरू सपना प्रधान मल्ल र नहकुल सुवेदीको संयुक्त इजलासले निर्वाचन स्थगित गर्ने कागजात झिकाउने निर्णय गरेपनि अल्पकालीन अन्तरिम आदेश निरन्तर हुने वा नहुने विषयमा कुनै आदेश गरेको छैन । 

नेपाल स्काउटको १२ वर्षपछि हुन लागेको निर्वाचनमा कोसी र वाग्मतीबाहेकका प्रदेशमा सर्वसम्मत नेतृत्व सम्पन्न भइसकेको छ । वाग्मती र कोसीको निर्वाचनको प्रक्रिया सुरु भएपछि स्थगित गरिएको हो । स्थगितविरुद्ध प्रमुख आयुक्त नै सर्वोच्च गएका हुन् । स्काउट निर्वाचनमा पनि सत्तारुढ दल नेपाली कांग्रेससहित र प्रमुख प्रतिपक्षी एमालेका स्वार्थ जोडिएका छन् ।