काठमाडौं । दैलेखमा शनिबार भएको सवारी दुर्घटनामा परेका नेपाल कम्युनिस्ट पार्टी (एमाले)का महासचिव शंकर पोखरेलको आइतबार काठमाडौंस्थित ट्रमा सेन्टरमा स्वास्थ्य जाँच गरिएको छ ।

सुर्खेतबाट दैलेख कार्यक्रममा सहभागी हुन जाने क्रममा उनी सवार गाडी सडकमा पल्टँदा पोखरेल सामान्य घाइते भएका एमाले केन्द्रीय कार्यालयका सचिव डा. भीष्म अधिकारीले जानकारी दिए ।

“उहाँ (शंकर पोखरेल) आज ट्रमा सेन्टरमा गई उहाँको स्वास्थ्य जाँच गर्दा सामान्य चोटपटक मात्रै देखिएको छ,” उनले भने, “उहाँको तिघ्रा र हातमा सामान्य चोट लागेको छ । भिडियो एक्सरे गरेर हेर्दा कुनै त्यस्ता खतरा छैन ।”

महासचिव पोखरेल आजै सुर्खेतबाट काठमाडौं आएका हुन् । जिल्ला अधिवेशन उद्घाटन गर्न दैलेख जान लाग्दा दैलेखको डुङेश्वर गाउँपालिका–१, चुप्रानजिकै उनी सवार गाडी सडकमा पल्टिएको थियो । गाडीमा एमाले महासचिव पोखरेलसहित केन्द्रीय सदस्य दीपा शर्मा, कर्णाली प्रदेश कमिटी सचिव ध्रुव शाही पनि थिए ।

गाडीमा रहेका कर्णाली प्रदेशका उपसचिव पद्मा खड्काको हातमा चोट लागेको एमालेका केन्द्रीय सदस्य विष्णु रिजालले जानकारी दिए । रासस