![नेपाल स्काउटको निर्वाचन : कोसी र वाग्मतीमा मतदान, बाँकीमा सर्वसम्मत](https://12khari.top/uploads/posts/nepal-scout1-1707559735.jpg)
काठमाडौं । नेपाल स्काउटको राष्ट्रिय परिषद् र प्रदेश परिषद्को निर्वाचन सुरु भएको छ । शनिबार काठमाडौंमा कोसी र वाग्मती प्रदेशका निम्ति राष्ट्रिय परिषद् र प्रदेश परिषद्को निर्वाचन सुरु भएको हो । अरू प्रदेशमा सर्वसम्मत रूपमा नेतृत्व चयन भएको छ ।
नेपाल स्काउटका निर्देशक रामप्रसाद भट्टराईले राष्ट्रिय परिषद् र प्रदेश परिषद्को निर्वाचन १२ वर्षपछि हुन लागेको जानकारी दिए । चार/चार वर्षमा हुनुपर्ने निर्वाचन भए पनि विविध कारणले लामो समयसम्म हुन नसकेको उनले बताए ।
उनले वाग्मती र कोसीबाहेक अरू पाँच प्रदेशमा सर्वसम्मत नेतृत्व चयन भएको उल्लेख गरे । वाग्मती र कोसी प्रदेशमा नौ पदका निम्ति निर्वाचन भइरहेको उनले बताए ।
उनले नौ पदको निर्वाचनका निम्ति वागमती प्रदेशमा १५ सय बढी र कोसी प्रदेशमा ५५४ मतदाता रहेका जानकारी दिए ।
निर्वाचनबाट नेपाल स्काउटको राष्ट्रिय परिषद् सदस्य ५६ मध्ये १६ जना वाग्मती र कोसी प्रदेशबाट चयन हुने उनले बताए । प्रदेश परिषद्हरूमा वाग्मती र कोसी प्रदेशमा २६/२६ जना निर्वाचित हुनुपर्ने उनले उल्लेख गरे ।
निर्वाचन निर्बाध रूपमा शान्तिपूर्ण ढंगबाट सञ्चालन भइरहेको उनले बताए । न्युज एजेन्सी नेपाल