सिमकोट । हुम्लामा आज बिहानदेखि पुनः हिमपात भइरहेको छ । यो वर्ष जिल्लामा चौथोपटक हिमपात भएको हो । शनिबार दिउँसो घाम लागेको भए पनि राति मौसममा फेरबदल भई बाक्लो बादल लागेर आज बिहानदेखि हिमपात भइरहेको छ ।

सदरमुकाम सिमकोटमा एक इन्चभन्दा बढी हिउँ जमेको छ । उत्तरी नाम्खा गाउँपालिकाको लिमीमा दुई इन्च बढी हिउँ जमेको लिमी स्वास्थ्यचौकीका स्वास्थ्यकर्मी गोखर भण्डारीले बताए ।

उनका अनुसार, लिमीमा अत्यधिक चिसो बढेकाले जनजीवन कष्टकर बनेको छ । चिसोका कारण घरबाहिर निस्कन र हिँड्डुल गर्न समस्या भएको उनले जानकारी दिए ।

नाम्खा गाउँपालिकाका लिमी, हिल्सा, नारालेख, यांगारलगायत उच्च भागमा बाक्लो हिउँ जम्नुका साथै हिमपात भइरहेको छ ।

नाम्खा, सिमकोट, खार्पुनाथलगायत अधिकांश उच्च क्षेत्रमा हिमपात भइरहेको छ भने होचा स्थानमा पानी परिरहेको छ ।

हिमपातले जेठासी बाली गहुँ, जौ, उवालाई राम्रो हुनुका साथै कात्तिके बाली लगाउनमा सहयोग भएको स्थानीय कमल भण्डारीले बताए ।

जिल्लाको एक मात्र अन्तरजिल्ला जोड्ने यातायातको साधन हवाई सेवा अवरुद्ध भएको छ । हिमपात हुँदा नेपालगन्ज, सुर्खेतबाट हवाई उडान हुन नसकेको हो । हुम्लाबाट नेपालगन्ज, सुर्खेत जाने यात्रु सिमकोटमै रोकिएका छन् । रासस