site stats
बाह्रखरी :: Baahrakhari
सम्पादकीय
Nabil BankNabil Bank
Sarbottam CementSarbottam Cement

‘अध्यागमन कर्मचारीलाई बिचौलियाले बुझाउँछन्, दैनिक करोड रुपैयाँ...’ समाचारका शीर्षक बनिरहेका छन् । 

नक्कली कागजातका आधारमा ‘भिजिट भिसा’ बनाउँदै ‘विदेश उडाउन’ सहयोग गरिरहेको आरोप–अभियोग लागिरहेकै थियो, अध्यागमन कर्मचारीलाई । अर्थात्, असुलीको धन्दाको फेहरिस्तमा ‘भिजिट भिसा काण्ड’ थपिँदै थियो । 

त्यहीबीचमा शुक्रबार २०८० माघ १२ मध्यान्ह १२ बजे अध्यागमन अधिकृत–प्रहरीबीच घम्साघम्सी भएको दृश्य सार्वजनिक भयो । अन्तर्राष्ट्रिय विमानस्थलभित्र भएको ‘हानाहान प्रकरण’ यतिखेर ‘गफ’, ‘टीकाटिप्पणी’ र ‘आरोप–प्रत्यारोप’को मसला बनेको छ ।

Prabhu Bank
Agni Group
NIC Asia

ड्यूटी पूरा गरी फर्किदै गरेका अध्यागमन अधिकृत छायालाल मोक्तानमाथि प्रहरीले खानतलासी गर्न खोज्दा अन्तर्राष्ट्रिय विमानस्थलमा अस्वाभाविक दृश्य मञ्चन हुन पुग्यो । 

अध्यागमनको जिकिरमा, आफ्ना अधिकृत मोक्तानमाथि प्रहरीबाट अश्लिल शब्द प्रयोग भएको र लछार–पछार गरी निर्घात कुटपिट भएको छ ।

Global Ime bank

यसलाई उच्च तहका कर्मचारीले ‘कर्मचारीको अपमान’ भनेका छन् । 

उता विमानस्थलमा खटिएका प्रहरी अधिकारीहरु चाहिँ ‘भिजिट भिसा’मा हुने गरेको कमाऊधन्दामा कडाइ गरेपछिको परिणति ठान्छन् । दुवैको तालुकवाला गृह मन्त्रालय हो र उसले घटना छानबिन गर्न समिति बनाइसकेको हुँदा तथ्य बाहिर ल्याउने नै छ ।

धेरैले यो घटनालाई ‘आकस्मिक’ ठानेका छन् । तर, वास्तविकता त्यस्तो होइन । त्रिभुवन विमानस्थल अधिकांश समय ‘टिम–च्यानल’ मिलाउने खेल थियो । 

कर्मचारी र प्रहरीबीच मिलेमतोकै कारण ‘तस्करी’, ‘भिजिट भिसा’ लगायत अनुचित कार्य चलिरह्यो । दुवैबीच मिलेमतो चलिरहँदा दुवैले कमाउँछन् अर्थात् असुल्छन् भन्ने आमटिप्पणी थियो । र, छ पनि ।

विमानस्थल वा भन्सारको हाकिम हुन उच्च अधिकारी तथा कर्मचारीहरुबीच अस्वस्थ प्रतिस्पर्धा हुनुको मूलभूत कारण अनुचित तवरमै कमाउन खोज्नु हो । त्यहाँ पुगेका कर्मचारीहरुको सम्पत्ति छानबिन गर्ने हो भने यथार्थ खुल्छ नै ।

हो, कहिले काहीँ ‘सेटिङ’ भत्किन पुग्छ, पक्राउ र हानाहानका घटना देखापर्छन् । यसले ‘सेटिङ’ भत्किएमा गडबडी वा खराबी नियन्त्रण हुन्छ भन्ने देखाउँछ ।

अझ मंसिरयता अध्यागमन कर्मचारी र प्रहरी ‘शीतयुद्ध’मा रहेकै हुन् । जब प्रहरीको उपत्यका अपराध अनुसन्धान कार्यालयका प्रहरीले गएको मंसिर २६ गते अध्यागमन अधिकृत नरबीर खड्कालाई पक्राउ गरेपछि ‘भिजिट भिसा’मा हुने चलखेलको पोल खुल्यो ।

प्रहरीले खड्कासहित सात अध्यागमन कर्मचारी, ट्राभल, कन्सल्ट्यान्सी र म्यानपावरसँग सम्बन्धित ३२ जनालाई प्रतिवादी बनाउँदै अनुसन्धान ग¥यो । जुन अनुसन्धान प्रतिवेदन सरकारी वकिलकहाँ पुगेको छ, कीर्ते र संगठित अपराधमा मुद्दा चलाउनुपर्ने निस्कर्षसहित ।

प्रहरीको फन्दामा पुगेका अध्यागमन कर्मचारीले त्यसरी संकलित रकम आफूहरुबीच बाँडचूँड गर्ने गरेको बयान दिएका छन् । त्यो घटनासँगै प्रहरीले अध्यागमन कर्मचारीलाई बढी शंका गर्दैथियो र अध्यागमन कर्मचारीहरु पनि बदलाकै भावनामा थिए । अर्थात्, अध्यागमन र सुरक्षा जाँचमा संलग्न नेपाल प्रहरी ‘शीतयुद्ध’मा थिए ।

केही समयअघि हङकङबाट आएको ‘ब्रेक शु’ मा लुकाएर ल्याइएको सुन पनि भन्सार चेकजाँचपछि प्रहरीको टोलीले समातेपछि कर्मचारी प्रहरीसँग सेटिङ भत्काइदिएको भन्दै आक्रोश बनेका थिए । 

यो घटनासँगै निजामती कर्मचारी–प्रहरी दुवैतिर आरोप–प्रत्यारोपको दोहोरी चलिरहेको छ । दुवैले आफ्नो ‘प्रतिष्ठा’को सवाल बनाएका छन्, ‘आफ्ना’लाई जोगाउन । त्यतिमात्र होइन, कर्मचारीतन्त्रले ‘अपमान’को रुपमा लिएका छन् ।

पुलिस कामै हो, जाँच गर्नु । असल नियत हुँदो हो त त्यसरी जाँचबुझ गर्दा प्रहरीसँग भिड्नुको तूक देखिँदैन । प्रहरीलाई उसको ‘ड्यूटी’ पूरा गर्न दिनु अध्यागमन कर्मचारीको दायित्व हो, न कि जाँच गर्दैमा अभद्र व्यवहार प्रदर्शन गर्न उत्रनु । कुनै ‘अन्यथा’ या ‘अनुचित उद्देश्य’ थिएन भने जाँचबुझ गर्नेमाथि नै जाइ लाग्नुको कारण देखिँदैन । यत्ति हो, प्रहरीले पनि नियतबश कसैलाई दुःख दिनु हुँदैन ।

अन्तर्राष्ट्रिय विमानस्थल संवदेनशील ठाउँ हो । त्यस्तो ठाउँमा हानाहान हुँदा अन्तर्राष्ट्रिय तहमा मुलुकको छवि कस्तो जान्छ ? सरकारी सयन्त्रका कर्मचारीले बुझ्नुपर्छ ।

अन्तर्राष्ट्रिय विमानस्थलको बेथिति र अराजकता सुन्दा सुन्दा आजित हुने स्थिति निरन्तर छ । विमानस्थलबाट ‘हात्ती’ छिराइ दिन सक्छु भन्दै अन्तर्राष्ट्रियस्तरमै नेपालको बदनाम भएकै छ । सुन तस्करीका घटना नियमित छन्, उच्चपदस्थ कर्मचारी मात्र होइन कि लोडर र सहयोगीहरू समेत मुछिएकै छन् ।

अझ ३३ किलो सुन तस्करी प्रकरणमा दुईजनाको ज्यानै गएको हो । जुन सुन आजसम्म भेटिएको छैन ।

विमानस्थलभित्र हुर्किएको बेथिति र दण्डहिनताकै कारण ‘ड्यूटी फ्री सप’ समेत राख्न नसक्ने स्थिति मुलुकले देखेकै हो, भोगेकै हो । त्यहाँ खटिएका प्रहरी तथा कर्मचारीकै ‘सेटिङ’मा ‘ड्यूटी फ्री’का मदिरा गायब हुन थालेपछि बन्द गर्नुपर्ने परिस्थिति बन्यो । 

अन्तर्राष्ट्रिय विमानस्थलमा एउटा ‘ड्यूटी फ्री सप’ समेत नहुँदा कसरी ‘अन्तर्राष्ट्रिय विमानस्थल’ हुन्छ ? विदेशका अनेक अन्तर्राष्ट्रिय विमानस्थल देखेका कर्मचारीले घोत्लिँदा हुन्छ ।

हाम्रो अन्तर्राष्ट्रिय विमानस्थलको पृष्ठभूमि ज्यादै फोहोरी छ । गृह मन्त्रालयले जुन समिति बनाएको छ, त्यसले एउटा घटना विशेष छानबिन प्रतिवेदन मात्र बुझाउने हो । 

तर अन्तर्राष्ट्रिय विमानस्थलमा जुन लाजमर्दाे दृश्य प्रदर्शन हुँदै आएका छन्, त्यसको न्युनीकरण गर्न दीर्घकालीन रणनीति कोर्नुपर्छ । त्यसो नगर्ने हो भने मुलुककै छवि अन्तर्राष्ट्रिय तहमै प्रभावित पारिरहन्छ ।

NIBLNIBL
प्रकाशित मिति: आइतबार, माघ १४, २०८०  १६:५९
Sipradi LandingSipradi Landing
worldlinkworldlink
प्रतिक्रिया दिनुहोस्
Ncell Side Bar LatestNcell Side Bar Latest
Bhatbhateni IslandBhatbhateni Island
cg detailcg detail
Kumari BankKumari Bank
Shivam Cement DetailShivam Cement Detail
Maruti cementMaruti cement
ICACICAC