विराटनगर । बाह्रखरी मिडियाका प्रधानसम्पादक प्रतीक प्रधान नोना कोइराला पत्रकारिता पुरस्कार–२०८० बाट पुरस्कृत भएका छन् । आइतबार विराटनगरमा एक कार्यक्रमबीच नोना कोइराला स्मृति प्रतिष्ठानले प्रधानलाई पुरस्कृत गरेको हो ।

प्रतिष्ठानका अध्यक्ष पुनम कोइराला र नेपाली कांग्रेसका नेता डा. शेखर कोइरालाले प्रधानलाई पुरस्कार प्रदान गरे । प्रधान यसअघि कारोबार र नागरिक दैनिकमा प्रधानसम्पादक तथा काठमाडौं पोस्टमा सम्पादक थिए ।

प्रधानले अमेरिकाको हार्वर्ड विश्वविद्यालयबाट जनप्रशासन, न्युयोर्क विश्वविद्यालयबाट पत्रकारिता तथा त्रिभुवन विविश्वविद्यालयबाट अर्थशास्त्र सहित तीन विषयमा स्नातकोत्तर गरेका छन् । पुरस्कार पाउनकै निम्ति पत्रकारिता नगरिने उनले बताए । कामको कदरस्वरूप पुरस्कृत गरेकामा उनले धन्यवाद दिए ।

प्रधान ३० वर्षदेखि पत्रकारितामा सक्रिय छन् । व्यावसायिक पत्रकारिताको विकास र लोकतन्त्रको उन्नयनमा गरेको योगदानको कदर गर्दै पुरस्कृत गरिएको नेता कोइरालाले बताए ।

कोइरालाले नोना कोइरालाको स्मरण गर्दै राजनीतिमा नैतिकता र संस्कार आवश्यक रहेको उल्लेख गरे । त्यो आफूले पारिवारिक विरासतका रूपमा प्राप्त गरेको उनले बताए ।

उनले भने, “प्रजातन्त्र भनेको चुनावमा जाने, सरकारमा जाने मात्र होइन । नेताहरूलाई मात्र प्रजातन्त्र आयो, अब जनतालाई आउनुपर्छ ।” कोइरालाले देश दण्डहीनताको अवस्थामा पुगेको पनि बताए ।

०६४ सालमा स्थापित प्रतिष्ठानले पत्रकारिता, स्वास्थ्य र सामाजिक क्षेत्रमा विविध कार्य गर्दै आएको यसका पूर्वअध्यक्ष डा. नारायण कुमारले बताए । उनका अनुसार, प्रतिष्ठानले यसअघि पत्रकारिता कलेज समेत सञ्चालन गरेको थियो । पूर्वाञ्चल विश्वविद्यालयबाट सम्बन्धन लिएर स्नातक तहसम्म पुनः सञ्चालन गर्ने तयारी रहेको उनले कार्यक्रममा जानकारी गराए ।

सार्क ट्रेड युनियन फेडेरेसनका अध्यक्ष लक्ष्मण बस्नेतले नेत्री कोइरालाले राजनीतिक रूपमा परेको गाँठो फुकाउन सधैँ समन्वय गर्ने गरेको स्मरण गरे । उनले भने, “कांग्रेसमा त्यो समन्वय अझ धेरै आवश्यक छ ।”

उनले कांग्रेसमा ‘म हुँ लिफ्ट दिने’ भन्ने होडबाजी र व्यक्तिवाद हावी रहेको आरोप लगाए । “संस्थागत काम नहुन्जेल देश विकास हुन सक्तैन,” उनले भने ।

महिला नेत्री रुक्मिणी कोइरालाले स्व. नोना कोइरालाले राजनीतिक र सामाजिक क्षेत्रमा दिएको योगदानको चर्चा गरिन् । उनले भनिन्, “उहाँ (नोना कोइराला)ले कहिल्यै पद नलिई राजनीतिक र सामाजिक विकासमा योगदान दिनुभयो ।”