काठमाडौं । नक्कली कागजातका आधारमा बिरामी जाँच गर्नेलाई प्रहरीले पक्राउ गरेको छ । पक्राउ परेका सम्बुद्ध भट्टचार्यले अर्कै व्यक्तिको नेपाल मेडिकल काउन्सिल (एनएमसी)मा दर्ता भएको नम्बर प्रयोग गर्ने गरेको पाइएको छ ।

काठमाडौं उपत्यका अपराध अनुसन्धान कार्यालयको टोलीले विराटनगर उपमहानगरपालिका–२ का ४० वर्षीय भट्टचार्यलाई महाराजगंजस्थित बाँसबारीबाट पक्राउ गरेको हो । प्रहरीले भट्टचार्यलाई सोमबार सार्वजनिक गरेको छ । 

लामो सयमदेखि फरार रहेका भट्टचार्यलाई आइतबार साँझ पक्राउ गरिएको कार्यालयका एसपी रवीन्द्र रेग्मीले जानकारी दिए ।

प्रहरीको अनुसन्धानका क्रममा भट्टचार्यले काउन्सिलमा एलिना श्रेष्ठको नाममा दर्ता रहेको एनएमसी ९६७० नम्बर प्रयोग गरेको पाइएको छ । 

भट्टचार्यले चीनबाट एमबीबीएस गरेको र त्रिभुवन शिक्षण अस्पताल महाराजगंजमा समेत काम गर्ने गरेको बताउँदै आएका थिए ।

प्रहरीले शिक्षण अस्पताल महाराजगंजमा ९७६० नम्बर दर्ता रहेको कार्ड समेत फेला पारेको छ । उक्त कार्ड समेत नक्कली रहेको खुलेको छ । त्योबाहेक प्रहरीले उनको साथबाट स्वास्थ्य तथा जनसंख्या मन्त्रालयको नक्कली लेटर प्याड, नक्कली स्ट्याम्पहरू बरामद गरेको छ । 

प्रहरीले उनको शैक्षिक प्रमाणपत्रको बारेमा समेत अुसन्धान जारी राखेको छ ।  उनले चीनबाट एमबीबीएस अध्ययन गरेको बताए पनि प्रहरीले त्यसबारे समेत अनुसन्धान थालेको छ ।

क्लिनिकमा गर्थे बिरामीको जाँच
प्रहरी अनुसन्धानका क्रममा भट्टचार्यले नक्सालस्थित वी केयर पोलिक्लिनिक र बसुन्धारास्थित धौलागिरि हिमाल पोलिक्लिनिकमा बिरामी जाँच गर्ने गरेको खुलेको हो ।

प्रहरीका अनुसार, नौ महिनादेखि उनी वी केयरमा काम गर्थे । त्यहाँ उनले ६३० बिरामीको जाँच गरेको खुलेको छ । प्रतिबिरामी जाँच गरेबापत उनले वी केयरमा ७५० रुपैयाँ शुल्क लिने गरेका थिए ।

त्यस्तै, धौलागिरि क्लिनिकमा ३० जना बिरामी जाँच गरेको खुलेको हो । त्यहाँ प्रतिबिरामी जाँच गरेबापत ५०० रुपैयाँ लिने गरेका थिए ।

दुवै क्लिनिकमा उनी इन्डोक्राइनोलजी विशेषज्ञको रूपमा बिरामी जाँच गर्ने गरेको खुलेको छ ।

यसअघि प्रहरीको केन्द्रीय अनुसन्धान ब्युरो (सीआईबी)ले  नक्कली कागजातका आधारमा बिरामी जाँच गर्ने डाक्टरमाथि अपरेसन नै चलाएको थियो ।

प्रहरीले भट्टचार्यमाथि कीर्ते र मानव स्वास्थ्यविरुद्धको दुई कसुरमा अनुसन्धान गर्ने एसपी रेग्मीले बताए ।