न्युयोर्क । १०० दिनभन्दा बढी समयदेखि गाजामा चलेको द्वन्द्वमा हरेक घण्टामा दुई ‘आमा’को मृत्यु हुने गरेको संयुक्त राष्ट्रसंघीय निकायले शुक्रबार जनाएको छ ।

लैंगिक समानता र महिला सशक्तिकरणका निम्ति काम गरिरहेको संयुक्त राष्ट्रसंघीय निकाय यूएन वुमनको प्रतिवेदनमा गाजामा युद्ध सुरु भएदेखि १०० दिनसम्मको महिलाको औसत मृत्युदरलाई मूल्यांकन गरी उक्त तथ्य सार्वजनिक गरिएको हो ।

गाजा संकटले महिला तथा बालबालिकाको जीवनस्तरमा विनाशकारी असर गरिरहेको ‘गाजा युद्धको लैंगिक प्रभाव’ नामक प्रतिवेदनमा उल्लेख छ ।

गाजाको स्वास्थ्य मन्त्रालयका अनुसार, गाजामा कम्तीमा २४ हजार ६२० प्यालेस्टाइनी मारिएका छन् । गाजामा मृत्यु भएका मध्ये करिब ७० प्रतिशत महिला र बालबालिका रहेको अनुमान गरिएको छ । तथ्यांकानुसार, महिला मृत्युमध्ये संकट सुरु भएदेखि अहिलेसम्मको औसत अनुपातमा प्रतिघण्टा दुई आमाको मृत्यु हुने गरेको छ ।

गाजामा १९ लाखभन्दा बढी व्यक्ति तथा त्यहाँको कुल जनसंख्याको ८५ प्रतिशत मानिस विस्थापित भएको विश्वास गरिन्छ । त्यसमध्ये यूएन वुमनले एक लाख महिला तथा बालबालिका रहेको अनुमान गरेको छ । गाजाको सम्पूर्ण जनसंख्यामध्ये लगभग २२ लाख व्यक्ति संकटमा वा तीव्र खाद्य असुरक्षाको मारमा रहेको अनुमान गरिएको छ ।

द्वन्द्वमा कम्तीमा तीन हजार महिला विधवा वा घरपरिवारविहीन भएका यूएन वुमनको अनुमान छ । कम्तीमा १० हजार बालबालिकाले आफ्ना पिता गुमाएका हुन सक्ने बताइएको छ ।

संयुक्त राष्ट्रसंघीय महिला कार्यक्रमकी कार्यकारी निर्देशक सिमा बाहुसले भनिन्, “विगत १५ वर्षमा प्यालेस्टाइनी राष्ट्रिय प्राधिकरण क्षेत्रमा मारिएका सबै नागरिकमध्ये दुईतिहाइ पुरुष रहेका छन् । यसैगरी, १४ प्रतिशतभन्दा कम महिला तथा बालिकाहरू रहेका छन् । तर, पछिल्लो १०० दिनमा मृत्यु हुनेमध्ये ७० प्रतिशत महिला र बालबालिका रहेका छन् । प्यालेस्टाइनी जनतालाई परेको आघातले हामी सबैलाई आउँदो पुस्तासम्म सताउनेछ ।” रासस/सिन्ह्वा