काठमाडौं । नुवाकोटको बेलकोटगढीमा हुने झिल्टुङ क्रसकन्ट्री दौडको आठौँ संस्करण माघ ६ गते हुने भएको छ । आयोजकले बुधबार पत्रकार सम्मेलनमार्फत प्रतियोगिताबारे जानकारी गराएको हो ।

नुवाकोटस्थित बेलकोटगढी नगरपालिका वडा–५ को आयोजनामा हुने प्रतियोगितालाई एथलेटिक्स परिवार नेपालले प्राविधिक सहयोग तथा संयोजन गर्ने छ ।

प्रतियोगिता बेलकोटगढी वडा–५ स्थित कोल्पुटारबाट सुरु भई बेलिनी, छाप, राजओडार, खड्ङ्गाछाप, सालचौर हुँदै फेरि कोल्पुटारमा आएर समाप्त हुने छ । दौडको दुरी १३.४ किलोमिटर कच्ची बाटो छ । 

प्रतियोगितामा खुला महिला/पुरुष, स्थानीय पुरुष, भेट्रान खुला पुरुष, खुला जुनियर १६ वर्ष मुनिका छात्रा/छात्र, स्थानीय १६ वर्ष मुनिका छात्रा/ छात्र, ४५ वर्षमाथिका स्थानिय पुरुष र स्थानीय आमा समूह गरी १० विधा समेटिएको छ ।

जसमा खुला महिला/पुरुष, स्थानीय पुरुष, भेट्रान खुला पुरुष १३.४ तथा अन्य ४.५ किमिको हुने छ । 

खुला महिला/पुरुषतर्फको विजेताले १५ हजार, उपविजेताले  १० हजार र तेस्रो हुनेले पाँच हजार रुपैयाँ प्राप्त गर्ने छन् । स्थानीय खुलातर्फको विजेतालाई १० हजार, उपविजेतालाई सात हजार र तेस्रो हुनेलाई पाँच हजार प्रदान गरिने छ । भेट्रान खुला पुरुषतर्फका शीर्ष तीनले आठ हजार, ६ हजार र चार हजार पाउने छन् ।

खुला जुनियर १६ वर्षमुनिका छात्रा/छात्र, स्थानीय १६ वर्षमुनिका छात्र/छात्र तथा ४५ वर्षमाथिका स्थानिय पुरुषतर्फका शीर्ष तीनलाई ६ हजार, चारहजार र दुई हजार प्रदान गरिने छ । स्थानीय आमा समूहतर्फको विजेताले १२ हजार, उपविजेताले नौ हजार र तेस्रो स्थान हासिल गर्नेले ६ हजार प्राप्त गर्ने छन् ।