काठमाडौं । दाङ प्रहरीले बुधबार घोराही उपमहानगरपालिका–६, अघराका ४५ वर्षीय शिवराज केसीको हत्या आरोपित सार्वजनिक गर्यो । केसीको हत्या आरोपमा प्रहरीले दाङ बंगलाचुली गाउँपालिका–४, गदारीका ४३ वर्षीय शेरबहादुर कुँवर, उनकी श्रीमती ३५ वर्षीया दीपा कुँवर, दीपाका भाइ २९ वर्षीय तिलक पुन र मेघबहादुर कुँवरलाइ पक्राउ गरेर सार्वजनिक गरेको हो ।
उक्त घटना ६ वर्षअघि दाङका व्यापारी राजकुमार श्रेष्ठको हत्या सम्झाउने गरी भएको छ । ०७४ जेठ २६ गते तुलसीपुरका व्यापारी श्रेष्ठको ‘हनी ट्रयाप’मा पारेर हत्या गरिएको थियो ।
तुलसीपुरकै १७ वर्षीया पूजा घर्तीलाई प्रयोग गरेर श्रेष्ठसँग प्रेमसम्बन्ध गर्न लगाइयो । पूजाले बोलाएको ठाउँबाट उनका बुवा टीकाराम घर्तीलगायत व्यक्तिको समूहले श्रेष्ठलाई अपहरण गरी हत्या गरेको थियो ।
उनीहरूले श्रेष्ठसँग तीन करोड रुपैयाँ फिरौती माग्ने उद्देश्यका साथ अपहरण गरेको प्रहरीको अनुसन्धानबाट खुलेको थियो । अपहरणपछि उनीहरूले श्रेष्ठलाई सल्यानको जंगलमा तीन दिनसम्म लगातार हिँडाएर बिरामी परेर ढलेपछि हत्या गरेका थिए ।
हाल पूजालगायत श्रेष्ठको हत्याका अभियुक्त उनकै बुवा टीकाराम र अरू संलग्न व्यक्तिले जेल जीवन भोगिरहेका छन् ।
ठिक त्यही शैलीमा केसीको हत्या गरिएको प्रहरीको अनुसन्धानबाट खुलेको छ । केसीको हत्यामा पनि शेरबहादुर कुँवरले आफ्नी श्रीमतीको प्रयोग गरेको जिल्ला प्रहरी कार्यालयका दाङका प्रमुख एवं प्रहरी उपरीक्षक (एसपी) रामबहादुर केसीले बताए ।
उनले श्रीमती दीपालाई फोन सम्पर्क गरी केसीलाई बोलाउन लगाएर बन्धनमा पार्ने योजना बनाएका थिए । केसीको सम्पत्ति हडप्ने उनको योजना थियो । तर, केसीले सम्पत्ति दिन अस्वीकार गरेपछि उनको हत्या गरिएको प्रहरी अनुसन्धानबाट खुलेको छ ।
यसरी बुनियो केसीको हत्या योजना
घोराही–६ स्थित अघरा टोल विकास संस्थाका अध्यक्ष समेत रहेका केसी यही पुस ८ गतेदेखि बेपत्ता थिए । उनी घरबाट ‘घोराही बजार जान्छु’ भनी निस्किएका थिए । त्यसपछि उनी परिवारको सम्पर्कमा आएनन् । केसी सम्पर्कविहीन भएपछि आफन्तले प्रहरी गुहारे ।
बेपत्ता भएको पाँच दिनपछि बंगलाचुली गाउँपालिका–४, गदारी जंगलको कोइलाखानीमा उनको शव भेटियो । खानीभित्र ६० मिटर गहिराइमा कोइलाको धुलोले छोपेको अवस्थामा केसीको शव भेटिएको थियो ।
प्रहरीले शवबारे अनुसन्धान गर्यो । केसीको छातीमा गोली लागेको भेटियो । प्रहरीले केसीको हत्या भएको आशंका गर्दै त्यही दिनदेखि अनुसन्धान तीव्र पार्यो । कोइलाखानी आसपासका दजनौँ मानिससित सोधपुछ गर्यो ।
प्रहरीले केसीसँग अन्तिम फोन सम्पर्क भएकामाथि कडाइका साथ सोधपुछ थाल्यो । केसीसँग शेरबहादुरकी श्रीमती दीपाको फोन सम्पर्क अस्वभाविक देखियो ।
दीपामाथि प्रहरीले थप केरकार गर्यो । त्यही क्रममा उनले केसीसँग आफ्नो प्रेमसम्बन्ध रहेको स्वीकार गरिन् । प्रेमसम्बन्धका कारण आफूले केसीलाई कोइलाखानीमा बोलाएको र आएपछि आफ्नो भाइ र श्रीमान्ले हत्या गरेको स्वीकार गरिन् ।
दीपा र शिवराजको प्रेमसम्बन्धबारे शेरबहादुर समेत जानकार रहेको प्रहरीको अनुसन्धानका क्रममा खुलेको छ ।
त्यो दिन शेरबहादुरले शिवराजलाई कोइलाखानीमा बोलाउन लगाउने योजना बनाए । घोराहीमा केसीको नाममा रहेको दुई कट्ठा जग्गा आफ्नो नाममा राख्न लगाउने योजना बुने । त्यहीबमोजिम दीपाले केसीलाई फोनमार्फत कोइलाखानीमा बोलाइन् ।
त्यहाँ दीपासँगै उनका श्रीमान् र भाइ तिकल पनि थिए । प्रेमिका भेट्ने आसमा कोइलाखानी पुगेका केसीलाई शेरबहादुर र तिलकले बन्धक बनाए । घर फर्कने भए घोराहीको दुई कट्ठा जग्गा दीपाको नाममा राखिदिन दबाब थिए ।
केसीले त्यो स्वीकार गरेनन् । त्यसपछि शेरबहादुरले भरुवा बन्दुकले केसीको छातीमा गोली हानेर हत्या गरे । हत्यालगत्तै उनीहरू भारत भागेका थिए ।
दाङ प्रहरीले भारतीय प्रहरीको सहयोगमा उनीहरूलाई पक्राउ गरेर बुधबार सार्वजनिक गरेको हो । दीपाले श्रीमान्सँग मिलेर ‘हनी ट्रयाप’मा पारी केसीको हत्या गरिएको प्रहरीको जिकिर छ ।
प्रहरीले केसीको हत्या गर्दा प्रयोग गरिएको भरुवा बन्दुक समेत बरामद गरेको छ । पक्राउ परेका चारैजनामाथि प्रहरीले थप अनुसन्धान अघि बढाएको छ ।
