काठमाडौं । नेपाल इन्जिनियर्स एसोसिएसन (नेईए)ले निजी तथा गैरसरकारी क्षेत्रमा कार्यरत इन्जिनियर र आर्किटेक्टहरूको न्यूनतम पारिश्रमिक निर्धारण गर्न माग गरेको छ ।

आइतबार नेईएका महासचिव इन्जिनियर रवि भुषण झा र अध्यक्ष इन्जिनियर हरिबहादुर दर्लामीले जारी गरेको प्रेस विज्ञप्तिमा निजी तथा गैरसरकारी क्षेत्रमा कार्यरत इन्जिनियर तथा आर्किटेक्टको पारिश्रमिकबारे हालसम्म कुनै नीति तथा नियम नबनेकोमा असन्तुष्टि व्यक्त गरिएको छ ।

नेपालमा निजी तथा सरकारी गरी हाल ४८ वटा इन्जिनियरिङ कलेज रहेको र विभिन्न संकायका गरी वार्षिक आठहजार इन्जिनियर उत्पादन हुने भएका कारण न्यूनतम पारिश्रमिक तोक्न आवश्यक रहेको नेईएको भनाइ छ ।

अधिकृतस्तरका सरकारी इन्जिनियरको मासिक तलब ४३ हजार ६८८ रहेकोमा निजी क्षेत्रका इन्जिनियरको मासिक तलब ३७ हजार १३५ हुनुपर्ने नेईएको माग छ ।

नेईएले सरकारी सेवाका इन्जिनियर तथा आर्किटेक्टको सबै सुविधा गरी हुन आउने मासिक तलबको ८५ प्रतिशतले नघट्ने गरी निजी क्षेत्रमा कार्यरत इन्जिनियर तथा आर्किटेक्टको न्यूनतम तलब तोकिनुपर्ने माग गरेको हो ।

सरकारी सेवामा तलब वृद्धि हुँदै जाँदा निजी क्षेत्रमा पनि सोही आधारमा समयानुकूल समायोजन तथा वृद्धि हुँदै जाने नीतिगत व्यवस्थासमेत हुनुपर्ने नेईएको माग छ ।