विराटनगर । शिवम् अर्गनाइजेसनले मोरङको बुढीगंगा गाँउपालिका वडा नम्बर १ मा २०० शय्या क्षमताको अस्पताल निर्माण गर्ने भएको छ । अर्गनाइजेसनले ३०० शय्यासम्म विस्तार गर्ने लक्ष्य लिएको छ ।

नेपाल सरकारबाट निर्धारित गरिएको आवश्यक कानुनी प्रक्रिया पूरा गरी निर्माण हुन लागेको अस्पताललाई आरआर इन्टरनेसनल अस्पताल नामाकरण गरिएको छ ।

अस्पतालबाट जटिल स्वास्थ्य सेवाका लागि विदेश र राजधानीका अस्पताल धाउनुपर्ने बाध्यता कम गरी गुणस्तरीय सेवा प्रदान गर्ने लक्ष्य राखिएको छ ।

अस्पतालबाट जनरल मेडिसन, न्युरो सर्जरी, जनरल सर्जरी, मृगौला रोग, मुत्ररोग, स्त्रीरोग तथा प्रसूति सेवा, आँखा रोग, नवजात शिशु तथा बालरोग, हाडजोर्नी तथा नशाको विशिष्टीकृत उपचार सेवा उपलब्ध गराउने योजना रहेको छ । सबै किसिमका शल्यक्रिया आधुनिक र विश्वसनीय प्रविधि तथा उपकरणको माध्यमबाट हुने गरी पूर्वाधार सुनिश्चित गरिने जनाइएको छ ।

अस्पतालको लागत करिब २५० करोड पुग्ने अनुमान गरिएको छ ।