काठमाडौं । विज्ञापन बोर्डका अध्यक्ष लक्ष्मण हुमागाईंले सार्वजनिक सेवा प्रसारण विधेयक छलफल नै नगरी संसद्‌मा पेस गरिएको भन्दै आपत्ति जनाएका छन् । 

मंगलबार काठमाडौंमा आयोजित एक कार्यक्रममा बोल्दै उनले सार्वजनिक सेवा प्रसारण विधेयक सरोकारवालाहरूसँग छलफल नै नगरी संसद्‌मा पेस गरिएकोप्रति आपत्ति जनाएका हुन् । उनले सो विधेयकबिना संशोधन पारित भए अहिलेको भन्दा कमजोर संरचना बन्ने बताए । 

विधेयकमा सञ्चारमन्त्रीको अध्यक्षतामा कार्यकारी परिषद् र कार्यकारी प्रमुख मन्त्रिपरिषद्को बैठकबाट नियुक्ति गर्नेकुरा उल्लेख गरिएको तर त्यो राम्रो नभएको बताए । कानुनी स्वायत्तता प्रदान गर्न नसकेसम्म परिषद् राम्रोसँग सञ्चालन नहुने उनको भनाइ थियो ।

उनले परिषद्को अध्यक्ष प्रतिनिधिसभाको प्रमुख (सभामुख) हुने र सञ्चारमन्त्री, सञ्चार हेर्ने संसदीय समितिको सभापति र राष्ट्रियसभाको उपाध्यक्षसहितको कार्यकारी परिषद्को गठन हुनुपर्ने बताए ।