सिरहा । सिरहाको औरही गाउँपालिका–२, तुलसीपुरमा ट्याक्टर पल्टँदा काका–भतिजाको मृत्यु भएको छ । अर्का एकजना घाइते भएका छन् ।

खेत जोतेर फर्कने क्रममा गागन नदीको तटबन्धबाट स१त ७४५८ नम्बरको ट्याक्टर पल्टँदा काका–भतिजाको मृत्यु भएको हो । मृत्यु हुनेमा स्थानीय ४० वर्षीय सुरेन्द्र यादव र उनकै भतिजा सात वर्षीय चन्दन रहेको जिल्ला प्रहरी कार्यालय सिरहाले जनाएको छ ।

ट्याक्टरको इन्जिनमा च्यापिएर उनीहरू दुवैजनाको घटनास्थलमा नै मृत्यु भएको स्थानीय श्याम यादवले जानकारी दिए । उनका अनुसार, ट्याक्टरमै चढेका रञ्जन यादव घाइते भएका छन् ।

दुर्घटनापछि प्रहरीले घटनास्थलमा मुचुल्का तयार पारी मृतक काका–भतिजाको शव परीक्षणका निम्ति सिरहा प्रादेशिक अस्पतालमा लगिएको जिल्ला प्रहरी कार्यालय सिरहाका सूचना अधिकारी एवं प्रहरी नायब उपरीक्षक रवीन्द्रराज पाण्डेले जानकारी दिए । रासस