काठमाडौं । कर्मचारी संगठनले ‘ग्राउन्ड ह्यान्डलिङ सर्भिस’का बारेमा नेपाल वायुसेवा निगमले कथित प्रचार गरेको आरोप लगाएका छन् ।
नेपाल राष्ट्रिय कर्मचारी संगठनका अध्यक्ष श्रवणकुमार यादव, कर्मचारी संगठनका अध्यक्ष मीनप्रसाद खनाल, लोकतान्त्रिक कर्मचारी संघका अध्यक्ष गणेशप्रसाद भुसाल र मधेस तराई कर्मचारी युनियनका अध्यक्ष अनिलकुमार गुप्ताले बिहीबार संयुक्त विज्ञप्ति जारी गर्दै सोबारे आपत्ति जनाएका छन् ।
ग्राउन्ड ह्यान्डलिङ सेवा खुला प्रतिस्पर्धाबाट दिने नेपाल उड्डयन प्राधिकरणको निर्णयविरुद्ध बुधबार (हिजो) निगमका कर्मचारीले आन्दोलन गरेका थिए ।
निगमले ग्राउन्ड ह्यान्डलिङ आफ्नै पुर्खाको बपौती र जन्मसिद्ध अधिकार हो भन्ने गरी कथित प्रचार र मिडियाबाजी गरेको कर्मचारी संगठनले आरोप लगाएका छन् ।
“त्रिभुवन अन्तर्राष्ट्रिय विमानस्थलमा अन्तर्राष्ट्रिय वायुसेवा कम्पनीहरूलाई प्रदान गर्ने कमर्सियल ग्राउन्ड ह्यान्डलिङ आफ्नै पुर्खाको बकौती (बपौती) र जन्मसिद्ध अधिकार हो भन्ने गरी गरिएका कथित प्रचारबाजी तथा मिडियाबाजीप्रति हामी आश्चर्यचकितसहित सो समूहको कानुनी अल्पज्ञानताप्रति हामी खेद प्रकट गर्द छौँ,” विज्ञप्तिमा उल्लेख छ ।
ग्राउन्ड ह्यान्डलिङ सञ्चालन गर्ने/गराउने अधिकार प्राधिकरणमा निहित रहेको पनि विज्ञप्तिमा जनाइएको छ ।
प्राधिकरणले ग्राउन्ड ह्यान्डलिङ सेवा सञ्चालन गर्न खुला प्रतिस्पर्धा गराउनुपर्ने हुन्छ । प्रतिस्पर्धाबाट छानिएको संस्थालाई सेवा सञ्चालन गर्न अनुमति दिने कानुनी व्यवस्था छ । कानुनानुसार ग्राउन्ड ह्यान्डलिङ प्राधिकरण आफैँले वा प्रतिस्पर्धाका आधारमा दिन सक्छ ।
-1743849429.jpg)
