विराटनगर । कोसी राजमार्ग शनिबार साँझदेखि अवरुद्ध भएको छ । अवरुद्ध राजमार्गको धरान–धनकुटा सडकखण्ड खुलाउने प्रयास सुरु भएको छ । 

बेलुका करिब ८ बजे साँगुरीगढी गाउँपालिका–६, कोलवोटेमा एउटा टिपर ब्रेक फेल भइ दुर्घटनामा परेको थियो । त्यसले अरु सवारी साधनलाई समेत ठक्कर दिएको थियो । 

जिल्ला ट्राफिक प्रहरी कार्यालय धनकुटाले जनाएअनुसार प्रदेश २–०३–००१ क १५२१ नम्बरको टिपर ब्रेक फेल भइ अर्को सवारी साधनलाई ठक्कर दिएको थियो । टिपर सडक छेउमा पल्टिँदा सडक अवरुद्ध बनेको प्रहरीले जनाएको छ । 

सडक खुलाउन क्रेन ल्याएर खुलाउने प्रयास भइरहेको धनकुटा ट्राफिक प्रहरी कार्यालयले जनाएको छ । दुर्घटनामा टिपरका सहचालक सिरहाका दीपेन्द्र कुसियत घाइते छन् ।