काठमाडौं । मोरङको उर्लाबारीमा आगलागी हुँदा घाइते भएकाहरूमध्ये ६ जनाको अवस्था गम्भीर रहेको अस्पतालले जनाएको छ । शुक्रबार घाइतेहरूको अवस्था बुझ्न कीर्तिपुर अस्पताल पुगेका युवा तथा खेलकुदमन्त्री डिगबहादुर लिम्बूलाई उपचारमा खटिएका चिकित्सिकहरूले उपचाररत २५ मध्ये ६ जनाको अवस्था गम्भीर रहेको बताएका हुन् ।

अस्पतालकी डाक्टर निजिना ताम्राकारले जलनको घटनामा सबै घाइतेहरूको अवस्था गम्भीर नै हुने बताइन् । नले चिकित्सकहरू घाइतेहरूको उपचारमा लागिरहेको बताइन् ।

"बर्न केसमा यति समय भन्न नै सकिँदैन, सबै चिकित्सकहरू काममा लागिरहनुभएको छ । यसको बेटर म्यानेजमेन्ट गर्ने छौँ । ६ जनाको अवस्था क्रिटिकल छ," उनले भनिन् । 

घाइतेको अवस्था बुझ्न अस्पताल पुगेका मन्त्री लिम्बूले अमेरिकाबाट थप चिकित्सकको टोली मगाएर घाइतेको उपचार गराउने प्रक्रिया सुरु गरिएको बताए । उनले अमेरिकाबाट आइतबारसम्म चिकित्सक आइसक्ने थप उपचार थाल्ने जानकारी गराए ।

गत कात्तिक २६ गते मोरङको उर्लाबारी–७, बरगाछीस्थित दीपक कार्कीको घरमा आगलागी हुँदा निभाउन गएका चार प्रहरीसहित २७ जना घाइते भएका थिए । तीमध्ये २५ जनालाई नेपाली सेनाको विमानमार्फत काठमाडौं ल्याइएको थियो ।