काठमाडौं । जाजरकोट केन्द्रविन्दु भएर शुक्रबार राति गएको ६.४ म्याग्निच्युडको भूकम्पले ठूलो क्षति गरेपछि नेकपा (एमाले)ले शनिबारको कार्यक्रम स्थगित गरेको छ ।

“विपत् र शोकको यस समयमा पार्टीले आज (शनिबार) राखेका शुभकामना आदानप्रदान तथा उत्सवसम्बन्धी सबै कार्यक्रमहरू स्थगित गर्न म देशभरका सबै पार्टी निकायहरूलाई आग्रह गर्दछु,” एमाले अध्यक्ष केपी शर्मा ओलीले सामाजिक सञ्जाल फेसबुकमा लेखेका छन् ।

जाजरकोट र रुकुम पश्चिममा भूकम्पले १०० जनाभन्दा बढीको ज्यान गएको दुःखद अवस्थामा देश रहेको उनले जनाएका छन् ।

“धेरै घाइते हुनुहुन्छ । भूकम्पमा ज्यान गुमाउनुभएका सबै दिदीबहिनी दाजुभाइप्रति श्रद्धाञ्जली अर्पण गर्दछु,” ओलीले भनेका छन् ।

घाइतेहरूको उद्धार र उपचारमा परिचालित हुन पार्टीका कार्यकर्ताहरूलाई उनले आह्वान गरेका छन् ।

उद्धार र राहतमा संलग्न स्वयंसेवकलाई त्यससँग सम्बन्धित आवश्यक सूचना र उद्धार राहतमा आवश्यक सामग्रीको व्यवस्थाका लागि सामाजिक सञ्जाललाई सदुपयोग गर्न उनले सुझाएका छन् ।

“देशभरिका साथीहरूले राहत र घाइतेको उपचारमा कसरी सहयोग गर्न सकिन्छ, त्यसतर्फ ध्यान दिनुहोला । विशेष गरी सुर्खेत, नेपालगन्ज, काठमाडौंका पार्टीका कमिटीहरूले उपचार, अस्पतालको व्यवस्थापन र घाइतेका लागि आवश्यक ब्लड संकलनमा सहयोग गर्नुहोला,” ओलीले भनेका छन् ।