काठमाडौं । धितोपत्र दोस्रो बजारमा गत आइतबारदेखि कारोबारमा आएको सोनापुर मिनरल्स एन्ड आयल लिमिटेडको सेयर मूल्य तेस्रो दिन (आज) पनि १० प्रतिशतले घटेर करोबार भएको छ ।

आइतबार र सोमबार नै १० प्रतिशतले मूल्य घटेर कारोबार भएको यो कम्पनीको मूल्य घट्नुमा म्युचुअल फन्डहरू प्रमुख कारण बनेका छन् । म्युचुअल फन्डले आफूले आरक्षणमा पाएको सेयर पहिलो दिनदेखि नै बेचेर बाहिरिन खोज्दा सोनापुरको सेयर मूल्य लगातार तेस्रो दिन पनि १० प्रतिशतले घटेको हो ।

म्युचुअल फन्डहरूले आज पनि अधिकतम एक हजार कित्तासम्म सेयर प्रतिकित्ता २५५ रुपैयाँ २० पैसामा बिक्री गर्न राखेका छन् । म्युचुअल फन्डहरूले यो कम्पनीको ६ लाख आठ हजार २८४ कित्ता सेयर प्रतिकित्ता २२५ रुपैयाँमा आरक्षण पाएका थिए ।

तर, कम्पनीको पहिलो सेयर कारोबारका लागि नेपाल स्टक एक्सचेन्ज (नेप्से)ले प्रतिकित्ता १४२.०१ देखि ४२६ रुपैयाँ ०३ पैसासम्म मूल्य रेन्ज दिएको थियो । सोहीअनुसार कम्पनीको पहिलो कारोबार प्रतिकित्ता ३१५ रुपैयाँमा खुलेको थियो ।

कम्पनीले सर्वसाधारणलाई भने प्रतिकित्ता २३७ रुपैयाँ ५८ पैसामा आईपीओ निष्कासन गरेको थियो । आज पनि मूल्य घटेर आईपीओकै मूल्यमा झर्न लागेको छ । आज यो कम्पनीको सेयर मूल्य प्रतिकित्ता २५५ रुपैयाँ २० पैसा कायम भएको छ ।

सोनापुरले सर्वसाधारण, आयोजना प्रभावित क्षेत्रका बासिन्दा र वैदेशिक रोजगारीमा गएका नेपालीलाई गरी कुल एक करोड २३ लाख २०० कित्ता सेयर निष्कासन गरेको थियो । उक्त सेयर नेप्सेमा कात्तिक २ गते सूचीकृत भएको हो ।