काठमाडौं । परराष्ट्रमन्त्री नारायणप्रकाश (एनपी) साउद आइतबार (आज) अमेरिका जाँदै छन् । संयुक्त राष्ट्रसंघका महासचिव एन्टोनियो गुटेरेससँगको भेटवार्ता सकिएपछि उनी अमेरिका प्रस्थान गर्ने परराष्ट्र मन्त्रालयले जनाएको छ ।

भ्रमणका क्रममा परराष्ट्रमन्त्री साउदले यही अक्टोबर ३० मा अमेरिकी विदेशमन्त्री एन्टोनी जे ब्लिन्केनसँग वासिङटन डीसीमा द्विपक्षीय भेटवार्ता गर्ने कार्यक्रम छ ।

परराष्ट्र मन्त्रालयका अनुसार भ्रमणमा परराष्ट्रमन्त्री साउदले अन्तर्राष्ट्रिय विकासका निमित अमेरिकी नियोग (यूएसएआईडी)की प्रशासक सामन्था पावर, मिलेनियम च्यालेन्ज कर्पोरेसनकी प्रमुख कार्यकारी अधिकृत एलिस पी. अल्ब्राइट र अमेरिकी सरकारका अरू उच्चस्तरीय अधिकारीहरूसँग पनि भेटवार्ता गर्ने कार्यक्रम छ ।

अमेरिकामा रहँदा उनी युनाइटेड स्टेट्स इन्स्टिच्युट अफ पिस (यूएसआईपी)मा आयोजना गरिने अन्तरक्रिया कार्यक्रम, नेपाली–अमेरिकी व्यवसायी समुदायसँग अन्तरक्रिया, गैरआवासीय नेपाली संघका प्रतिनिधि र नेपाली–अमेरिकी व्यवसायीसँगको अन्तरक्रियामा सहभागी हुनेछन् ।

परराष्ट्रमन्त्रीको नेतृत्वमा अमेरिका जाने नेपाली प्रतिनिधिमण्डलमा अमेरिकाका निम्ति नेपाली राजदूत श्रीधर खत्री, परराष्ट्र मन्त्रालय र वासिङटन डीसीस्थित नेपाली दूतावासका वरिष्ठ अधिकारीहरू छन् ।

परराष्ट्रमन्त्री साउद यही कात्तिक १९ गते नेपाल फर्कनेछन् ।