नयाँ दिल्ली । भारतीय क्रिकेटका नायक तथा महान् स्पिन बलर विशनसिंह बेदीको ७७ वर्षको उमेरमा निधन भएको छ । भारतीय खेलमन्त्री अनुराग ठाकुरले सोमबार बेदीको निधनले क्रिकेट खेलमा ‘अत्यन्त ठूलो क्षति’ भएको बताए ।
“भारतीय क्रिकेट टिमका पूर्वकप्तान, बलर विशनसिंह बेदी रहनु भएन, जसलाई भारतले सधैँ सम्झिनेछ,” भारतीय क्रिक्रेट कन्ट्रोल बोर्ड (बीसीसीआई) का पूर्वअध्यक्ष ठाकुरले पत्रकारसँग भने, “यो अत्यन्त दुःखद खबर हो र क्रिकेटका लागि अत्यन्त ठूलो क्षति हो । यो दुःखद घडीमा सम्पूर्ण क्रिकेटजगत् उहाँको परिवारको साथमा छ ।”
इरापल्ली प्रसन्ना, श्रीनिवास वेंकटराघवन र भागवत चन्द्रशेखरसहितको प्रसिद्ध चार स्पिन बलरमा समावेश विशनले सन् १९६७ देखि सन् १९७९ का बीच आफ्नो सानदार अन्तर्राष्ट्रिय करियरमा ६७ टेस्ट म्याचमा २६६ विकेट लिएका थिए ।
बायाँहाते स्पिन बलर बेदीले सन् १९७४ देखि १९७९ सम्म १० एकदिवसीय अन्तर्राष्ट्रिय प्रतियोगिता पनि खेलेका थिए । बेदी प्रायः साथीहरू, क्रिकेट खेलाडी र खेलका कमजोर प्रशासकको आलोचनामा स्पष्टवादी थिए ।
ठूलो पगरी र हँसिलो अनुहारका साथ उनी दिल्लीमा क्रिकेट कार्यक्रमहरूमा नियमित सरिक हुन्थे । तर, पछिल्ला केही वर्षमा खराब स्वास्थ्यका कारण उनी सक्रिय सामाजिक जीवनबाट टाढा थिए ।
दुई विवाह गरेका बेदीका दुवै श्रीमतीबाट दुई छोरा र दुई छोरी छन् । उनका कान्छा छोराले सन् २००२ को मिस इन्डिया जितेकी अभिनेत्री तथा मोडल नेहा धुपियासँग विवाह गरेका छन् ।
पाकिस्तानका पूर्वकप्तान इन्तिखाब आलमले उनको निधनमा दुःख प्रकट गरेका छन् । उनले भनेका छन्, “उहाँसँग मेरो धेरै सौहार्दपूर्ण र मित्रतापूर्ण सम्बन्ध थियो । उहाँ एक महान् स्पिनर हुनुहुन्थ्यो । यो क्रिकेट र विशेष गरी भारत–पाकिस्तान क्रिकेटका लागि ठूलो क्षति हो ।” रासस/एएफपी
