काठमाडौं । कोसी प्रदेशको मुख्यमन्त्रीमा कांग्रेस नेता शेखर कोइरालाले केदार कार्कीको विकल्पमा अर्को नाम दिन नसकेको कांग्रेस सभापति शेरबहादुर देउवाले बैठकमा बताएका छन् ।
पार्टीको कार्यसम्पादन समिति बैठकपश्चात पार्टी प्रचार विभाग प्रमुख मीन विश्वकर्माले प्रधानमन्त्री पुष्पकमल दाहाल प्रचण्डले समेत कांग्रेसबाट सर्वसम्मत नाम आउँछ भने मुख्यमन्त्री छाड्ने बचन दिएका थिए । तर, कार्कीको विकल्पमा शेखरले नाम दिन नसकेको विश्वकर्माले जानकारी दिए ।
“कार्यसम्पादन समितिमा आउँछु भनेर उहाँ आउनुभएन । भोलि उपयुक्त समयमा बस्ने गरेर बैठक स्थगन भएको छ,” विश्कर्माले भने, “यसले गठबन्धनमा पर्न सक्ने समस्यालाई कसरी समाधान गर्ने र कोसीमा गठबन्धनबाटै सरकार बनाउने कुरा भएको छ ।”
कोसीमा केदार कार्कीलाई मान्न के समस्या भयो भन्ने प्रश्नमा विश्वकर्माले भने, “२०५१ को अवस्था दोहोरिएको देखिन्छ । यसलाई सामान्य रूपमा लिन मिल्दैन । विद्रोहलाई स्थापित गर्ने भए पार्टी अनुशासन र स्वरुप रहँदैन ।”
उहाँले अर्को नाम भन्न सक्नुपर्दथ्यो भन्दै विश्वकर्माले भोलि पहिलो चरणमा बस्ने बैठकमा निर्णय हुने विश्वास व्यक्त गरे । उनले गठबन्धन र कांग्रेस दुवै बचाउनुपर्ने आवश्यकता रहेको बताए ।
