काठमाडौं । नेकपा एमाले सुदूरपश्चिम प्रदेशमा उपसचिवमा कुरा नमिल्दा नेतृत्व चयनको प्रक्रिया लम्बिएको छ । जारी अधिवेशनमा अध्यक्षका आकांक्षी चारजनाबाट दुईजनाले उमेदवारी फिर्ता लिँदा पनि उपसचिवमा सहमति हुन सकेको छैन ।  

अध्यक्षमा आकांक्षा राखेका कमल तिमिल्सिना र बचनबहादुर सिंहले उमेदवारी फिर्ता लिइसकेका छन् । अध्यक्षका उमेदवारमा स्थायी कमिटी सदस्य कृष्णप्रसाद जैसी र नेता भीम रावल पक्षका भरत साउद छन् ।

अध्यक्षमा जैसीलाई निर्विरोध गराउन नेताहरु लागेका छन् । उपाध्यक्षमा कालीबहादुर शाही निर्विरोध भइसकेका छन् । रावल पक्षधरले सहमति नै गर्ने भए आफूहरुलाई पदाधिकारीमा दुईवटा पद दिनुपर्ने अडान राखेका छन् । 

उपसचिवमा उमेदवार दिलबहादुर विकका नाममा सहमति नभए चुनाव हुने साउद बताउँछन् । उपसचिवमा अशोक चन्दले उमेदवारी फिर्ता लिएर नरबहादुर विकलाई छाड्नुपर्ने सर्त रावल पक्षको छ । अरु नेता रावल पक्षलाई दुईवटा पद दिन तयार छैनन् ।

“उनीहरुले उपसचिवका प्रतिनिधिलाई नाम फिर्ता गर्न लगाएका छैनन् । नरबहादुर विकलाई निर्विरोध नछाडेसम्म अध्यक्षमा म पनि छाड्दिनँ,” साउद भन्छन्, “त्यसो नभए चुनावमा जाने हो ।”

चुनावमा जाँदा अन्य प्रदेशमा गुट सिर्जना भएको भन्दै शीर्ष नेताहरुले सहमतिमा नै नेतृत्व टुंग्याउन दबाब दिएका छन् । 

“अरु प्रदेशमा निर्वाचनमा जाँदा गुट बन्यो भनेर सहमतिमा नै निर्वाचन गर्न दबाब छ । सहमतिका लागि प्रयास भएकै छ । सदस्यहरुमा कल्स्टरबाट सहमति भइरहेको छ । त्यसैले पनि प्रक्रिया लम्बिएको हो । सायद, सबै सहमतिमा नै टुंगिन्छ,” एक नेता बाह्रखरीसँग भन्छन् ।