काठमाडौं । विश्वकपमा देशबाट प्रतिनिधित्व गर्न पाउनु कुनै पनि खेलका खेलाडीहरुको सबैभन्दा ठूलो उपलब्धिमा गनिन्छ । अझ दाबेदार राष्ट्रबाट खेलिसकेपछि विश्वकपको उपाधि जित्नु उनीहरुका लागि सबैभन्दा ठूलो लक्ष्य बनेको हुन्छ ।

धेरै क्रिकेटरहरूको लागि एकदिवसीय अन्तर्राष्ट्रिय विश्वकप यस्तै प्रतिष्ठित प्रतियोगिता हो । तर, केही शीर्ष स्तरका खेलाडीहरूले चार वर्षमा एकपटक आउने प्रतियोगिता चोट वा कहिलेकाँही छनोटकर्ताको रणनीतिक निर्णयका कारण गुमाउँछन् ।

यसपटक भारतमा एकदिवसीय क्रिकेटको महाकुम्भ चलिरहँदा केही शीर्ष स्तरका क्रिकेटरहरु विभिन्न कारण टिममा छैनन् । यसैमध्ये भारतमा जारी एकदिवसीय विश्वकप गुमाएका चर्चित पाँच क्रिकेटरहरु यस्ता छन्ः

तामिम इकबाल (बंगलादेश)

एकदिवसीय अन्तर्राष्ट्रिय क्रिकेटमा तामिम इकबाल बंगलादेशको सबैभन्दा प्रभावशाली ब्याटर हुन् । र, बंगलादेशी क्रिकेटले अहिलेसम्म पाएको सबैभन्दा उत्कृष्ट ब्याटर । तर, भारतमा जारी विश्वकपको यस संस्करणमा इकबाल बंगलादेशी टिममा छैनन् ।

छनोटकर्ताका अनुसार इकबाल ढाडको चोटका कारण टिममा नअटाएका हुन् । देव्रे हाते ओपनर ब्याटर इकबालले २४३ एकदिवसीय अन्तर्राष्ट्रिय खेलमा १४ शतकसहित आठ हजार ३५७ रन बनाएका छन् ।

इकबाल पछिल्लो केही वर्षयता भने चोटका कारण बंगलादेशी टिमको नियमित सदस्य बन्न सकेका छैनन् । उनले यसै वर्षको सुरुआतमा अन्तर्राष्ट्रिय क्रिकेटबाट सन्यासको घोषणा गरे पनि केही समयपछि फिर्ता लिएका थिए ।

नसिम साह (पाकिस्तान)

पछिल्लो समय साह पाकिस्तानी बलिङ आक्रमणको प्रमुख हतियार बनेका थिए । साहिन साह अफ्रिदीसँग ओपनिङ बलिङमा दबाब झेल्न सक्ने क्षमताका कारण उनी युवा उमेरमै पाकिस्तानी प्रमुख बलर बनेका थिए । पाकिस्तानबाट १४ एकदिवसीय अन्तर्राष्ट्रिय क्रिकेटमा २० वर्षीय नसिमले ४.६८ को इकोनोमीसहित ३२ विकेट लिएका छन् । उनी तल्लो क्रमको ब्याटिङमा आएर केही ठूला प्रहार गर्न सक्ने क्षमता पनि राख्छन् ।

तर, एसिया कपमा भारतविरुद्ध काँधमा चोट लागेपछि पाकिस्तान नसिमबिनै भारतीय भूमिमा जारी विश्वकप खेलिरहेको छ । पाकिस्तानी छनोटकर्ताका अनुसार नसिम करिब तीनदेखि चार महिना मैदानबाट बाहिर रहनेछन् ।

जासन रोय (इंग्ल्यान्ड)

ओपनर जासन रोयले विश्वकपका लागि घोषित इंग्ल्यान्डको प्रारम्भिक टिममा स्थान बनाएका थिए । तर, भारत जाने अन्तिम १५ टिममा भने रोयले स्थान बनाउन सकेनन् । इयोन मोर्गनको कप्तानीमा इंल्यान्डले एकदिवसीय विश्वकपको उपाधि जित्दा रोय टिमका महत्वपूर्ण सदस्य थिए ।

सन् २०१९ को विश्वकपका सात खेलमा ४४३ रन बनाएका रोय इंग्ल्यान्डबाट सबैभन्दा धेरै रन बनाउनेमध्येका एक खेलाडीसमेत थिए । पछिल्लो समय ३३ वर्षीय रोयले चोटका कारण इङ्ल्यान्ड टोलीमा स्थायी रूपमा खेल्न सकेका छैनन् । गत महिना न्युजिल्यान्डविरुद्धको एकदिवसीय शृंखलामा ढाडको समस्याका कारण विश्वकपको टोलीमा समावेश हुनबाट वञ्चित भएका थिए ।

वनिन्दु हसरंगा (श्रीलंका)

पछिल्लो केही वर्षयता वनिन्दु हसरंगाले श्रीलंकामा शीर्ष क्रिकेटरको सम्मान पाएका छन् । लेग स्पिरन हसरंगाले एकदिवसीय अन्तर्राष्ट्रिय क्रिकेटमा ६७ विकेट लिँदा तीनपटक एकै खेलमा पाँच विकेट लिएका छन् । यस्तै, ब्याटिङमा पनि चार अर्धशतकसहित ८३२ रन बनाएका छन् ।

तर, एसिया कपका दौरान हसरंगा घाइते भएका थिए । र, अझसम्म चोट पूर्ण रुपमा ठिक नभइसकेको हुँदा विश्वकप खेल्ने टिममा उनलाई नसमेटिएको श्रीलंकाको छनोट समितिले बताएको छ । हसरंगा पछिल्लो दुई ट्वान्टी–२० विश्वकपमा सबैभन्दा धेरै विकेट लिने खेलाडी बनेका थिए ।

मिचेल ब्रासवेल (न्युजिल्यान्ड)

मिचेल ब्रासवेल सन् २०२२ को न्युजिल्यान्डका ‘एकदिवसीय वर्ष क्रिकेटर’ चुनिएका थिए । गत जुनमा इंग्लिस काउन्टी खेलका दौरान खुट्टामा चोट लागेपछि उनी भारतमा हुने विश्वकपको १३औँ संस्करण खेल्ने टिममा अटाएनन् ।

ब्याटिङ र बलिङ दुवै गर्न सक्ने उनले एकदिवसीय क्रिकेटमा ४२.५ को औषतमा ब्याटिङ गर्छन् । उनले न्युजिल्यान्डबाट १९ अन्तर्राष्ट्रिय एकदिवसीय खेलमा दुई शतकसहित ५१० रन बनाएका छन् । यस्तै, ब्रासवेलले बलिङ १५ विकेट लिएका छन् ।