काठमाडौं । चीनको हाङझाउमा जारी १९औं एसियाली खेलकुदमा सहभागी भएर नेपाली राष्ट्रिय क्रिकेट टिम आज स्वदेश फर्किंदै छ । 

नेपाली क्रिकेट टिम आज बिहान ११ः३० बजे त्रिभुवन अन्तर्राष्ट्रिय विमानस्थल आइपुग्ने नेपाल क्रिकेट संघ (क्यान) ले जनाएको छ । 

एसियाडको पुरूष क्रिकेटमा नेपाली टिमले क्वार्टरफाइनलसम्मको यात्रा तय गरेको थियो । तर, अन्तिम ८ को खेलमा भारतसँग २३ रनले पराजित भएपछि एसियाडमा नेपाली टिमको यात्रा समाप्त भएको हो । क्वार्टरफाइनलमा भारतले प्रस्तुत गरेको २०३ रनको लक्ष्य पछ्याउने क्रममा नेपालले निर्धारित २० ओभरमा नौ विकेट गुमाएर १७९ रन बनाएको थियो ।

त्यसअघि, नेपालले समूह चरणका खेलमा मंगोलियाविरुद्ध २७३ रन र माल्दिभ्सविरुद्ध १३८ रनको जित निकालेको थियो ।