काठमाडौं । प्रमुख प्रतिपक्षी दल नेकपा (एमाले) अध्यक्ष केपी ओलीले काुननमन्त्री धनराज गुरुङलाई मरेका मान्छेहरुबाट भोट हाल्न लगाएर, बुथ कब्जा गरेर चुनाव जितेको आरोप लगाएका छन् ।

मंगलबार प्रतिनिधिसभा बैठकमा विशेष समय लिएर बोलेका उनले कानुनमन्त्री गुरुङमाथि धाँधली गरेर चुनाव जितेको आरोप लगाए । “चुनाव कसरी भयो मैले भन्नुपर्दैन । कसरी लामो समय लगाएर कानुनमन्त्री यसरी छानियो, यो मन्त्री नियुक्तिमा किन ढिलाइ भएको रहेछ, छनोटमा किन सकस परेको रहेछ भनेको योग्यता पुगेको माछे खोज्नुपर्यो,” उनले भने ।

९९ प्रतिशत मत कहीँ कतै नखस्ने भन्दै निर्वाचन अधिकृतले नै ज्यान मार्ने धम्की दिएर त्यतिधेरै मत खसेको जिकिर गरे ।

“बुथ कब्जा ९९ प्रतिशतसम्म मत खसेर जित्नका लागि । ९९ प्रतिशत मत खस्छ कहीँ ? १० प्रतिशत मतादाता खाडीमा छन्, यहाँ ९९ प्रतिशत मत खस्यो । केही मान्छे माथि गए, ती पनि मत खसाउन आए, पितृले पनि मत खसाले,” उनले भने, “मृत्यु दर्ता समेत भएका मतदाताको मत खसेको, विदेशमा भएकाहरुको पनि मत खाएको छ । कब्जा, ज्यान मार्ने धम्की दिएका छन् । अनि कसरी भयो निष्पक्ष निर्वाचन ?”

फरक प्रसंगमा उनले न्यायपालिकाप्रति जनताको विश्वास तथा भरोसा भएको र हुनुपर्ने भन्दै ६ महिनासम्म महाअभियोग छिनोफानो नगराएर गठबन्धन सरकारले न्यायपालिकाको गरिमा घटाएको जिकिर गरे ।