पोखरा । बागलुङबाट पोखरातर्फ आउँदै गरेको टाटासुमो जीपलाई बाढीले बगाउँदा त्यसमा सवार तीनजना बेपत्ता भएका छन् । शनिबार साँझ पर्वतको कुश्मा नगरपालिका–७ र ८ को सिमानास्थित तमादीखोलामा आएको बाढीले ग१च ६२१३ नम्बरको जीप बगाएको हो ।
जीपमा चालकसहित चारजना सवार थिए । चालक सकुशल छन् । हामफालेर आफूले ज्यान जोगाएको चालकले बताएको प्रहरीले जनाएको छ ।
जिल्ला प्रहरी कार्यालय पर्वतका प्रमुख एवं डीएसपी खुमलाल भुसालका अनुसार बेपत्ता भएका तीनैजना पुरुष हुन् ।
तमादीखोलामा पुगेपछि चालकले जीपलाई ‘वेट’ लगाउन खोजेका थिए । त्यहीक्रममा गेग्रानसहितको बाढीले जीप बगाएको चालकलाई उद्धृत गर्दै भुसालले जानकारी दिए ।
प्रहरीका अनुसार हालसम्म गाडी र गाडीमा सवार व्यक्तिहरू फेला परेका छैनन् ।
जीपमा सवार तीन यात्रीमध्ये एकजना बागलुङको धौलागिरि काउन्टरबाट चढेका थिए । बाँकी दुईजना चालकको सम्पर्कका आधारमा बीचबाटोबाट जीपमा चढेका प्रहरीले जनाएको छ । बेपत्ताको खोजीकार्य जारी रहेको डीएसपी भुसालले बताए ।
