काठमाडौं । ‘जसरी हुन्छ जनतासँग नजिकको सम्बन्ध राख्नू’ नेकपा (एमाले)का अध्यक्ष केपी शर्मा ओलीले नेता–कार्यकर्तालाई बेलाबखत निर्देशन दिने गर्छन् । सार्वजनिक कार्यक्रममा समेत जनतालाई नमस्कार गर्दा सानो होइँदैन भन्दै उनी कार्यकर्तालाई सम्झाउने गर्छन् ।

ओली आफैँले पनि जनतासँग जोडिन अनेक विधि अपनाउँछन् । यतिखेर सामाजिक सञ्जालको ‘उधुम’ प्रयोग गरी जनतासँग जोडिइरहेका छन्, उनी । स–साना विषयमा ध्यानाकर्षण गराउन उनले अपनाएको शैली रोचक पनि देखिन्छ ।

गएको आइतबार उनले बालबालिकाले आफ्नो कोटको प्रशंसा गरेको उल्लेख गरे । “मैले यी नानी–बाबुहरूसँग एक्लाएक्लै फोटो खिचेँ । यिनीहरूमध्ये धेरैले मलाई कानमा खुसुक्क भने– कोट खुब सुहाएको छ, बा ! साँच्चै सुहाएको हो कि यिनीहरूले मलाई जिस्क्याइएका हुन् !,” ओलीले फेसबुकमा तस्बिर पोस्ट गर्दैै लेखेका छन् ।

उनी दिनहुँजसो स्ट्याटस पोस्ट गरिरहेका हुन्छन् । गएको आमनिर्वाचनताका बिहान–बिहान उनले सूर्योदयको तस्बिर राख्ने गरेका थिए । त्यति बेला उनले अप्रत्यक्ष रूपमा पार्टीको चुनाव चिह्नको प्रचार गरे ।

ओलीले प्रविधिको अधिकतम प्रयोग गरिरहेका छन् । उनी फेसबुक, युट्युब, टिकटक र इन्स्टाग्राममा भेटिन्छन् । उनका फलोअर्स पनि लाखौँमा छन् ।

‘बा’ ब्रान्ड 
ओलीले ‘बा’लाई ‘ब्रान्ड’ बनाएका छन् । ओेलीका समर्थकले एकताका ‘केपी ‘बा, आई लभ यु’को नारा घन्काएका थिए । उनले ‘बा’लाई ब्रान्ड नै बनाइदिए ।

गत वर्ष मंसिर ४ गतेको निर्वाचनलक्षित गरेर उनले ‘कल केपी बा’ कार्यक्रम सञ्चालन गरेका थिए । म्यासेज बक्समा नम्बर छाडेका फेसबुक प्रयोगकर्तासित कुराकानी गरेका थिए ।

ओलीले ०७७ मंसिरमा टिकटक अकाउन्ट खोलेका थिए । त्यति बेला उनी प्रधानमन्त्री थिए । ओलीको युट्युब च्यानल पनि छ । युट्युब च्यानलको नाम ‘केपी बा’ राखिएको छ । उनले आफ्ना अनुभव युट्युबमार्फत सार्वजनिक गर्ने गरेका छन् ।

ओलीको निवास बालकोटमा हो । उनको सचिवालयले फेसबुकमा ‘बालकोट’ पेज सञ्चालन गर्दै आएको छ । अर्थात्, बा र बालकोटलाई ब्रान्ड बनाइएको छ ।

सक्रियताको राज 
ओली सामाजिक सञ्जाल आफैँ चलाउँछन् । नयाँ–नयाँ शैली अपनाउँछन्, कहिलेकाहीँ । ओलीको सचिवालय सदस्य रामशरण बजगाईंका अनुसार ओली आफ्ना ‘आइडिया’ सेयर गर्ने गर्छन् ।

“सामाजिक सञ्जाल आफैँले चलाउनुहुन्छ । अध्यक्षसँग धेरै कुराको आइडिया छ नि !,” उनले बाह्रखरीसित भने, “आफ्ना आइडिया सेयर गर्नुहुन्छ र अरूको कुरा सुन्नुहुन्छ ।”

जनतासँगको सम्बन्धलाई प्रभावकारी बनाउन ओलीले प्रविधिको उपयोग गरेको बजगाईंको भनाइ छ । “हिजो जनतासँग भेट्न भौतिक रूपमा आमसभामार्फत मात्रै जानुपर्थ्यो । अहिले पनि त्यसरी पनि जानुहुन्छ । तर, प्रविधिलाई उपयोग गरेर जनताका बीचमा जानुपर्छ, जनतासँग राम्रो सम्बन्ध राख्नुपर्छ भन्नेमा दृढ हुनुहुन्छ,” उनले भने ।

पहिले पनि ओली जनतासँग निकट रहेको भन्दै उनले अहिले प्रविधिको प्रयोगमार्फत प्रस्तुत भएको बताए । “जनताको भनाइ, भावना के छ भन्ने बुझ्नुपर्छ भन्ने उहाँको पहिलेदेखिको कुरा हो । फेसबुक नहुँदा पनि उहाँ जनताको बीचमै हुनुहुन्थ्यो,” उनले भने, “प्रविधिको प्रयोग गरेर जनतासँग जोडिनुभएको हो ।”

सामाजिक सञ्जालमा सकारात्मक र नकारात्मक दुवैखाले कमेन्ट गरिन्छ । त्यस्ता कमेन्ट ओली आफैँ पढ्छन् । कमेन्ट ‘नोटिस’मा पनि राख्ने गर्छन् । विभिन्न कार्यक्रममार्फत उनी त्यसको जवाफ फर्काउन पछि पर्दैनन् । ओली युट्युब हेर्छन् । पत्रपत्रिका पढ्छन् । अनलाइन न्युज पनि अध्ययन गर्छन् ।

प्रविधिको प्रयोग गर्दागर्दै ओली चिप्लिएका उदाहरण पनि छन् । कम्बोडियाको भ्रमणबाट फर्कने क्रममा त्रिभुवन अन्तर्राष्ट्रिय विमानस्थलमा उनले सुन प्रकरणमा आफ्नो नाम जोडेर फोटो छापिएको भन्दै आक्रोश पोखेका थिए । तर, ओलीको फोटो छापिएको थिएन ।

ओलीले सामाजिक सञ्जालका लागि भनेर समय तोकेका छैनन् । अनुकूल अवस्थामा सक्रिय हुन्छन् । उनी आफैँ स्ट्याटस पोस्ट गर्छन् । आफूले थाहा पाएका सूचना सेयर गर्छन् । सुझाव लिन्छन् ।

जनता जहाँ छन्, आफू पनि त्यहीँ हुनुपर्छ भन्ने मान्यताले ओली ‘गाइडेड’ छन् । “जनता जहाँ छन्, म त्यहीँ हुनुपर्छ भन्ने मान्यताले उहाँलाई गाइड गरेको छ,” बजगाईंले भने, ‘‘जनताभन्दा फरक हुनु हुँदैन, जनता र हामी एउटै हो, जनताका लागि काम गर्ने हो भन्ने कुरा मनमा राखेर गर्नू भनेर नेता–कार्यकर्तालाई निर्देशन पनि दिँदै आउनुभएको छ ।”

जुनसुकै प्रविधिमार्फत जोडिएर भए पनि जनतासँगको सम्बन्ध घनिष्ठ बनाउन उनले निर्देशन दिने गरेका छन् ।

उनले विद्यार्थी, युवालक्षित कार्यक्रम पनि गर्र्दै आएका छन् । भेट्न चाहनेहरूलाई सहजै पहुँच दिएका छन् । उनलाई भेट्ने मानिस ‘कन्भिन्स’ भएर फर्कने उनीनिकट नेताहरू बताउँँछन् । उनलाई भेटेर फर्किएकाहरूको फेसबुक पोस्टले पनि त्यो कुरालाई उजागर गर्छ ।