काठमाडौं । क्यानडाले भारतका विषयमा नयाँ ‘ट्राभल एडभाइजरी’ जारी गरेको छ । ट्राभल एडभाइजरीमा क्यानडाले आफ्ना नागरिकलाई अत्यधिक सावधान रहन आग्रह गरेको छ ।

अप्रत्याशित सुरक्षा स्थितिका कारण केन्द्र शासित जम्मु–कश्मीरको यात्राबाट जोगिन क्यानडाले आफ्ना नागरिकलाई भनेको छ ।

मंगलबार जारी गरिएको ट्राभल एडभाइजरीमा उल्लेख छ, “जम्मु–कश्मीरमा आतंकवाद, उग्रवाद, अशान्ति र अपहरणको खतरा छ ।” ट्राभल एडभाइजरी लद्दाखको यात्रालाई समेटिएको छैन ।

क्यानडले भारतको पूर्वोत्तर क्षेत्रमा पनि आफ्ना नागरिकलाई नजान सल्लाह दिएको छ । गुजरात, पञ्जाब र राजस्थानको पाकिस्तानसँग सीमा जोडिएका क्षेत्रमा समेत नजान क्यानडाले भनेको छ ।

क्यानडाले यस्तो बेला नयाँ ट्राभल एडभाइजरी जारी गरेको छ, जति बेला क्यानडा र भारतबीच तनाव बढिरहेको छ ।

• भारत र क्यानडाबीच किन चर्कियो विवाद ?

सोमबार क्यानडाका प्रधानमन्त्री जस्टिन ट्रुडोले हरदीप सिंह निञ्जरको हत्यामा भारत सरकारको हात रहेको आशंका जनाएका थिए । त्यसपछि क्यानडाले एक भारतीय कूटनीतिज्ञलाई देशबाट निष्कासित गरेको थियो ।

जवाफमा भारतले पनि क्यानडाका एक कूटनीतिज्ञलाई निष्कासित गरेको थियो । भारतले क्यानडाले लगाएको आरोप अस्वीकार गरेको छ ।

“सिख पृथकतावादी नेताको हत्यमा भारतीय एजेन्टको संलग्नता रहेको आशंका व्यक्त गर्नुपछाडिको उद्देश्य भारतलाई उक्साउनु थिएन । क्यानडा चाहन्छ, भारतले यस घटनालाई ठिक तरिकाले सम्हालोस्,” क्यानडाका प्रधानमन्त्रीले मंगलबार भनेका थिए ।

क्यानडाका प्रधानमन्त्रीले यस घटनालाई गम्भीरताका साथ लिन भारतलाई आग्रह गरेका छन् । यो एकदमै गम्भीर विषय भएकाले अन्तर्राष्ट्रिय कानुनमा यसले दूरगामी परिणाम दिने चेतावनी समेत उनले दिएका छन् । बीबीसीबाट ।