काठमाडौं । गत साताको अन्तिम कारोबार दिन बुधबार ३९ अंक बढेर बन्द भएको सेयर बजार आइतबार भने ४२.१४ अंकले घटेर बन्द भएको छ । यसदिन बजार २.०९ प्रतिशत घटेर १९६४.९१ विन्दुमा बन्द भएको हो ।

घटेको बजारमा शुभम् पावर लिमिटेडका लगानीकर्ताले भने सर्वाधिक कमाएका छन् । यस कम्पनीको सेयर मूल्य प्रतिकित्ता ८९ रुपैयाँ ६० पैसा बढेको छ भने प्रतिशतको हिसाबमा प्रतिकित्ता १० प्रतिशतले मूल्य बढेको छ । यो कम्पनीको सेयर मूल्य प्रतिकित्ता ९८५ रुपैयाँ ६० पैसा कायम भएको छ ।

कारोबार रकम भने बढेको छ । दुई अर्ब दुई करोड ८४ लाख रुपैयाँको सेयर कारोबार भएको छ । गत साताको अन्तिम करोबार दिन भने एक अर्ब ४९ करोड रुपैयाँको सेयर कारोबार भएको थियो ।

कारोबारमा आएका १३ वटै समूहगत परिसूचक घटेका छन् । सर्वाधिक परिसूचक घट्नेमा व्यपारी समूह रहेको छ । यो समूहको परिसूचक ३.३३ प्रतिशतले घटेको छ । फाइनान्स समूहको परिसूचक ३.३० प्रतिशत र होटेल तथा पर्यटन समूहको परिसूचक ३.२९ प्रतिशतले घटेको छ ।

एनआईसी एसिया बैंकको सेयर कारोबारले सर्वाधिक बजार हिस्सा ओगटेको छ । यस दिन यो बैंकको २७ करोड ५४ लाख रुपैयाँको सेयर कारोबार भएको छ । यो बैंकले गत साता साढे ३० प्रतशित लाभांश दिने घोषणा गरेकाले पनि लगानीकर्ता आकर्षित भएको देखिन्छ । 

बैंकको सञ्चालक समितिको भदौ २८ गतेको बैठकले २९ प्रतिशत बोनस सेयर र कर प्रयोजनका लागि १.५२६३ प्रतिशत नगद लाभांश दिने प्रस्ताव गरेको छ ।