काठमाडौं । सत्तासाझेदार दल नेपाली कांग्रेसका सांसद अर्जुननरसिंह केसीले वर्तमान सरकारले भ्रष्टाचार नियन्त्रण गर्छ भन्ने कुराको विश्वास नभएको बताएका छन् ।

एक वर्ष पनि काम गर्न नदिएर प्रहरी अधिकारीको सरुवा गरिएकाले वर्तमान सरकारले भ्रष्टाचार नियन्त्रणका लागि केही काम गर्छ भन्ने विश्वास हराएको उनले बताए ।

सोमबार प्रतिनिधिसभा बैठकमा विशेष समय लिएर उनले भ्रष्टाचारका फाइल एकपछि अर्को खोलिए पनि त्यो बीचमै तुहिने अवस्था आएको उल्लेख गरे । उनले त्यसतर्फ सरकारलाई सचेत गराए ।

सांसद केसीले मुलुकमा सामाजिक सद्भाव बिलोलिने काम भइरहँदा पनि सरकार मूकदर्शक बनेको भन्दै आक्रोश व्यक्त गरे ।

“भ्रष्टाचार र तस्करीबाट सम्पूर्ण देश आक्रान्त छ । जबसम्म भ्रष्टाचारलाई सही ढंगबाट जरोसम्म पुगेर त्यसलाई निराकरण गर्न सकिन्न, त्यति बेलासम्म सुशासनको प्रत्याभूति हुन सक्दैन । भ्रष्टाचारविहीन समाज नै सुशासनको प्रत्याभूतिको आधार हो । फाइलहरू एकपछि अर्को खुलेका छन्, तर ती कुनै पनि टुंगोमा नपुग्ने र बीचमै त्यो तुहिनेखालको जो परिस्थितिहरू देखा परेको छ, सम्माननीय सभामुख महोदय, पाँच महिना र सात महिना नपुग्दै अहिले प्रहरी अफिसरहरू जुन ढंगले परिवर्तन भएका छन्, त्यो परिवर्तन के का लागि, किन ? कमसेकम न्यूनतम एक वर्षसम्म रहने त सामान्य नियम हो,” उनले भने, “जुन ढंगले सरुवा गर्ने काम भएको छ, त्यसले आमरूपबाट भष्टाचार गतिविधिहरूलाई नियन्त्रण हुन्छ भन्ने कुराको विश्वास हराएको छ । सरकार यतातिर सतर्क बनोस् ।”

भ्रष्टाचार नियन्त्रणका लागि विगतमा बनाइएका आयोगहरूको सुझाव कार्यान्वयन नभएको उनले स्मरण गरे । अब बनाइने आयोगले पनि केही काम गर्ला भनेर अपेक्षा गर्न सकिने अवस्था नरहेको उनले पटकपटक दोहोर्‍याए ।