काठमाडौं । भोलि श्रीलंकाको क्यान्डीमा नेपाल र भारतबीच खेल हुँदै छ । खेलमा टस भने रोहितले जित्ने पक्का छ ।

तर, कुन रोहित ?

नेपाली राष्ट्रिय क्रिकेट टिमका कप्तान रोहित पौडेल कि भारतीय क्रिकेट टिमका कप्तान रोहित शर्मा ? यसको टुंगो भोलि नै लाग्ने छ ।

एसिय कप २०२३ अन्तर्गत क्यान्डीमा दुई रोहित आमने–सामने हुँदा नेपाली टिमका कप्तानलाई गुमाउन केही छैन । नेपालका लागि नतिजा भारतविरुद्ध चुनौती प्रस्तुत गर्दाको अनुभवमात्र हो । र, अर्को सिकाइ र ठूलो मञ्चमा आफूलाई प्रमाणित गर्ने अवसर पनि ।

यसको ठिकविपरीत नेपालविरुद्ध हारे भारतको सर्वस्व नै गुम्नेछ । एसिया कपको १६औँ संस्करणमा भारतको चुनौती समूह चरणमै समाप्त हुनेछ । भारतसँग हालसम्म एसिया कपको समूह चरणबाट बाहिरिनु परेको अनुभव छैन । नेपालसँग हारे एसिया कपको यो संस्करण भारतका लागि सबैभन्दा खराब बन्नेछ ।

नेपालसँगको हारले सम्भवतः भारतीय टिमका मुख्य प्रशिक्षक राहुल द्रविडविरुद्ध राजीनामाको चर्को दबाब पनि थपिएला । भारतले पछिल्लो २२ वर्षयता एसोसिएट राष्ट्रविरुद्ध हार बेहोरेको छैन । भारतले पछिल्लोपटक सन् २००१ को त्रिदेशीय श्रृंखलामा केन्यासँग ७० रनको हार बेहोरेको थियो ।

यो त कल्पनाको कुरामात्रै ।

कपिल देव, राहुल द्रविड, वीरेन्द्र सहवाग, सचिन तेल्दुल्कर, महेन्द्रसिंह धोनी हुँदै रोहित शर्मा र विराट कोहलीजस्ता क्रिकेट हस्तीलाई जन्माएको भारतलाई ‘क्रिकेटप्रति पागल देश’को रुपमा चिनिन्छ ।

विश्व क्रिकेटमा रहेको यही प्रभुत्वका कारण नेपालमा पनि भारतीय टिमको समर्थन गर्ने समर्थकको संख्या ठूलो छ । नेपाली टिमका कप्तान रोहितकुमार पौडेल पनि भारतीय क्रिकेटबाट प्रभावित हुने यो सूचीमा पर्छन् ।

भोलि नेपालका कप्तान रोहितका लागि भने सपना पूरा भएको दिन बन्नेछ । नवलपरासीमा जन्मिएका रोहित क्रिकेटमा भारतीय कप्तान रोहित शर्मालाई आफ्नो ‘आइडल’ मान्छन् । एक प्रशंसकलाई आफ्नो ‘आइडल’विरुद्ध मैदान उत्रन पाउनुभन्दा ठूलो उपलब्धि अरु के नै हुन सक्छ र ?

“सानैदेखि रोहित शर्माको ब्याटिङ हेर्दै आएको । निक्कै मन पथ्र्यो । खेल सकिएपछि अनुभवका कुरा होला, त्यो अनुभवलाई सिकाइमा परिवर्तन गर्नेछु । निक्कै उत्साहित फिल भइरहेको छ,” एसिया कपका लागि पाकिस्तान उड्नुअघि नेपाली टिमका कप्तान रोहित कुमार पौडेलले आफ्नो ‘आइडल’ रोहित शर्माविरुद्ध खेल्न पाउने अवसरलाई बयान गर्दै भनेका थिए ।

नेपाली रोहित भारतीय रोहितको तारिफका लागि शब्द खर्चिन कहिल्यै पछि पर्दैनन् । नेपाली टिमको कप्तानी जिम्मेवारीमा रहेका रोहित सोमबार श्रीलंकाको क्यान्डीस्थित पालेकेले अन्तर्राष्ट्रिय रंगशालामा टसका लागि अर्का रोहितविरुद्ध उत्रिनेछन् ।

नेपाली रोहित ‘आइडल’विरुद्ध टसका लागि मैदान उत्रिँदाको परिस्थितिलाई कल्पना गर्छन् ? जवाफमा रोहित भन्छन्, “म कहिल्यै पनि त्यस्तो कल्पना गर्दिनँ । खेल कसरी जित्छु भन्ने भिजुअलाइज गर्छु । टसभन्दा पनि म एक ब्याटरको रुपमा बलरहरुलाई कसरी खेल्ने भन्नेबारे सोच्छु ।”

दुई रोहितको तुलना

सन् १९२८ मा गठन भएको भारतीय क्रिकेट बोर्डले सन् १९३२ मा पहिलो टेस्ट खेलेको थियो । क्रिकेटमा भारतको स्पष्ट इतिहास नै लगभग एक शताब्दी पुरानो छ । नेपालले भने सन् १९९० को दशकपछि मात्र अन्तर्राष्ट्रिय क्रिकेटमा पाइला अघि बढाएको थियो । एक शताब्दी पुरानो क्रिकेट संघका खेलाडीसँग भर्खरै तीन दशकमा पाइला राख्दै गरेको संघका खेलाडीको तुलना पक्कै पनि केही असहज लाग्छ ।

भारतीय रोहित र नेपाली रोहितबीच तुलना पनि दुई क्रिकेट संघको जस्तै हुन्छ । भारतीय रोहित उमेरले मात्रै पनि ३६ वर्ष पुगिसके । नेपाली रोहित हिजोमात्र २१ वर्ष पूरा भए ।

रोहित शर्माले २००७ मा आयरल्यान्डविरुद्ध एकदिवसीय अन्तर्राष्ट्रिय क्रिकेटमा भारतबाट ‘डेब्यू’ गरेका थिए । जतिबेला नेपाली रोहित पाँच वर्षका मात्र थिए । डेढ दशक लामो एकदिवसीय करियरमा रोहित शर्माले नौ हजार ८४८ रन बनाइसकेका छन् । ४८.५१ को ब्याटिङ औषतमा भारतीय रोहितले ३० शतक र ४८ अर्धशतक बनाएका छन् । उनी एकदिवसीय अन्तर्राष्ट्रिय क्रिकेटको एकै खेलमा सबैभन्दा धेरै व्यक्तिगत रन (२६४ रन) बनाउने क्रिकेटर समेत हुन् । रोहितले सन् २०१४ मा श्रीलंकाविरुद्ध यो कीर्तिमान बनाएका थिए ।

सन् २०१८ मा मात्र एकदिवसीय मान्यता पाएको नेपाली टिमका कप्तान रोहितले भने एकदिवसीय अन्तर्राष्ट्रिय क्रिकेटमा एक हजार ४६९ रन बनाएका छन् । एकदिवसीय क्रिकेटमा नेपाली ब्याटरमध्ये रोहित सबैभन्दा धेरै रन बनाउने क्रिकेटर हुन् । ३१.२५ ब्याटिङ औषत रहेको रोहितले यसक्रममा आठ अर्धशतक र एक शतक प्रहार गरेका छन् ।

दबाबमा भारत

समूह ‘ए’को अन्तिम खेलको रुपमा भोलि नेपाल र भारत प्रतिस्पर्धाका लागि मैदान उत्रिनेछन् । पहिलो खेलमा दुवै टिमले अपेक्षाअनुरुपको नतिजा पाउन सकेनन् । पाकिस्तानविरुद्ध ३४३ रनको लक्ष्य पछ्याउने क्रममा नेपाल २३८ रनले पराजित भयो । नेपाल २३.४ ओभरमा १०४ रनमै समेटियो ।

भारत भने समूह चरणको पहिलो खेलमा वर्षाले प्रभावित बन्यो । क्यान्डीमै शनिबार भारतले पाकिस्तानविरुद्ध २६७ रनको लक्ष्य प्रस्तुत गरेको थियो । तर, पहिलो इनिङपछि लगातार वर्षा हुँदा खेलको दोस्रो इनिङ सम्भव हुन सकेन । यसैकारण दुवै टिमले एक–एक अंक पाए । त्यही एक अंकका कारण पाकिस्तानले सुपर फोरको यात्रा निश्चित गर्दा भारतलाई भने नेपालविरुद्ध जित्नैपर्ने समीकरण बनेको छ ।