काठमाडौं । नेकपा (माओवादी केन्द्र)का अध्यक्ष समेत रहेका प्रधानमन्त्री पुष्पकमल दाहाल प्रचण्डले अब आफूलाई केही लिनुदिनु नभएको बताएका छन् । सुर्खेतमा आयोजित सन्देश सभामा उनले बाँकी जीवन उपलब्धिको रक्षाका लागि लगाउने उद्देश्य रहेको सुनाए ।

“अब मलाई केही लिनु छैन, दिनु छैन । जे छ, राष्ट्रको लागि र जनताका लागि, क्रान्तिको लागि र उपलब्धिको रक्षाका लागि बाँकी जीवन सम्पूर्ण रुपले लगाउनबाहेक केही उद्देश्य छैन,” उनले भने, “यो सरकार कति समय चल्छ, चल्दैन, मेरो टेन्सन त्यतापट्टि छैन । कतिपय मान्छेले सरकार जोगाउन यसो गर्यो भन्छन्, वाहियात कुरा भन्छन् ।”

उनले सरकारको सुरुआत गर्दा १५ दिनमै हट्न परे पनि ठिकै भनेर गरिएको सुनाउँदै आठ महिना पुगेको बताए । राम्रो जनताले देख्ने भन्दै कसले हटाउँदो रहेछ हेर्छु भन्नेमा रहेको पनि बताए ।

“मैले सरकारको नेतृत्व गर्दै गर्दा १५ दिन भए पनि ठिकै छ, एक महिना भए पनि ठिकै छ भनेको थिएँ,” उनले भने, “राम्रो काम गर्छु । राम्रो काम गर्दा गर्दै कसले हटाउँदो रछ हेर्छु । नेपाली जनताले हेर्छन् ।”

प्रधानमन्त्री प्रचण्डले भ्रष्टाचार विरोधी अभियानमा आफ्ना पार्टीका नेतालाई छाडिएको भन्ने कुरा गलत भएको बताए । उनले छानबिन गर्दा आफंै देखिए पनि नछोड्नु भनेको सुनाए ।

“मैले सीआईबीलाई भनेँ– यदि दोषी देखिन्छ भने माओवादीको जोसुकै नेता भए पनि र गर्दै जाँदा बाटोमा प्रचण्ड देखियो भने त्यसलाई पनि नछोड भनेको छु,” उनले भने ।