काठमाडौं । सत्तारुढ नेकपा (एकीकृत समाजवादी)का सांसद् अमरबहादुर थापाले गिरीबन्धु टी–स्टेटको फाइल कहिले खुल्छ भन्दै सरकारलाई प्रश्न गरेका छन् ।

आजको प्रतिनिधिसभा बैठकमा उनले ३४३ बिघा जग्गाको मूल्य खरबौं रहेको बताए । त्यो जग्गा राष्ट्रका नाममा ल्याउने कि व्यक्तिलाई धनी बनाउने भन्दै प्रश्न गरे ।

“अहिले गिरीबन्धुको कुरा पनि आएको छ । ०२१ सालमा अधिकरण गरेको जग्गा २१ सालमै भूमिसुधार ऐनअन्तर्गत हदबन्धी लागेको जग्गा,” उनले भने, “फेरि पनि सट्टापट्टा गरेर गिरीबन्धुलाई जग्गा दिएर त्यहाँ तस्करीको अवस्था कसले कहाँनेर सिर्जना गरेको छ ? त्यो फाइल कहिले खुल्छ सरकारले जवाफ दिनुपर्‍यो ।”

उनले सुन तस्करी प्रकरणको कारबाही कहाँ पुग्यो, भुटानी शरणार्थीको अवस्था सदनमा जानकारी गराउन माग गरे ।

आजकै ससद्को विशेष समयमा बोल्दै एमालेका प्रमुख सचेतक पदम गिरीले गिरीबन्धु टि स्टेट लागयतका सबै फाइल सरकारले छान्नुपर्ने बताएका थिए ।