![कोसीमा विश्वासको मत लिन सभाध्यक्षको समेत मत जोडियो, प्रतिपक्षको नाराबाजी](https://12khari.top/uploads/posts/Koshi1692620056.jpg)
विराटनगर । कोसी प्रदेशका मुख्यमन्त्री उद्धव थापाले प्रदेश सभाको बैठकको अध्यक्षता गरेका सभाध्यक्ष मण्डलका सदस्य कांग्रेस सांसद इसराइल मन्सुरीसमेतको मत जोडेर विश्वासको मत पाएका छन् ।
सभामुखको जिम्मेवारीमा रहेका सभाध्यक्ष मण्डलका सदस्य कांग्रेस सांसद इसराइल मन्सुरीले सोमबारको बैठक सञ्चालन गरेका थिए । उनले पनि मुख्यमन्त्री थापाको पक्षमा मतदान गरेका छन् । पक्षमा ४७ मत परेको छ । विपक्षमा ३० मत खसेको छ । बैठकमा कायम रहेका ९३ सदस्यमध्ये ७७ उपस्थित थिए ।
मत सच्याउने अवधिको घण्टी बजिसकेपछि इसराइलले सभाध्यक्ष मण्डलका अर्की सदस्य गीता तिम्सिनालाई सभाको अध्यक्षता गर्न समय दिएका थिए । त्यसलगत्तै एमालेका सांसद उठेर यो प्रक्रिया गलत भएको भन्दै विरोध जनाएका थिए । उनीहरूले नाराबाजी नै गरेका थिए ।
संविधानको धारा १६८ को उपधारा ४ बमोजिम विश्वासको मत लिन प्रदेश सभामा शुक्रबार सूचना दर्ता गराएका थिए । थापाले सूचना दर्ता गराई आइतबारका लागि बैठक बोलाउन अनुरोध गरेका भए पनि उपसभामुख सिर्जना दनुवारले सोमबार तोकेकी थिइन । तर, बैठकको दिन कार्यव्यवस्था परामर्श समितिको बैठकमा समेत सहभागी नभई दनुवार बिहानै विराटनगरबाट काठमाडौं लागेकी थिइन । यती एयरको विमानबाट उनी बिहान सवा ८ बजे काठमाडौं उडेकी थिइन ।
यसअघि सभाध्यक्ष मण्डलमै रहेका एमालेकी मालती लिम्बू र राप्रपाका सांसद अमरबहादुर विष्ट बिदामा बसेका थिए । त्यसपछि वर्णानुक्रमका आधारमा मन्सुरीले सभा सञ्चालन गर्नुपरेको हो ।
बैठकमा राप्रपाका सबै ६ सांसद अनुपस्थित थिए । गठबन्धनका कांग्रेसका २९, माओवादी केन्द्रका १३, एकीकृत समाजवादीका ४ र जसापका १ सांसद छन् । एमालेका ४० र राप्रपाका ६ सांसद छन् ।